La XDLA afala a mercar llibros y discos nel idioma del país

La Xunta pola Defensa de la Llingua Asturiana (XDLA) presentó una campaña pa promocionar el consumu de llibros y discos n’asturianu. El coleutivu vese obligáu a tomar esta iniciativa énte la pasividá de les instituciones públiques.

Esta campaña lleva’l nome de ‘Regála(te) discos y llibros n’asturianu’ y consiste nun llamativu cartelu diseñáu por Xulio Casado que la XDLA va distribuyir en tolos establecimientos que venden llibros y discos n’asturianu, cola intención de que tamién tenga visibilización nes grandes superficies. “Queremos tratar de convencer a les instituciones y a la xente qu’esiste una producción asturiana de calidá comparable a la d’otres llingües”, esplica Carlos Pulgar, voceru d’una asociación que quier facer de “ponte ente la producción cultural asturiana y la sociedá”, dalgo que “les instituciones han de facer, pero que nun faen”. El coleutivu cívicu entiende que la campaña que van poner en marcha nun tien namái un motivu cultural, sinón que busca caltener un sector económicu importante n’Asturies “que detrás tien persones y xente profesional que trabaya nello y que merez esi apoyu”.

Un aspeutu que considera importante la XDLA ye qu’esta campaña, amás d’al públicu en xeneral, ta destinada tamién a les alministraciones públiques, “que tienen les sos biblioteques y les sos escueles onde los discos y llibros n’asturianu han de tar visibles y al accesu de la xente dende ñenos. Asina, éstos tendrán el vezu y les ganes de conocer esti tipu de producciones nel futuru”. D’igual forma, la iniciativa tampoco se queda nel regalu a terceros, sinón que tamién pretende aumentar l’autoconsumu d’estos productos.

Nel actu de presentación de la campaña tuvieron representaos los dos sectores por Ediciones Trabe y L’Aguañaz. Pola editorial uviedina acudieron los sos dos responsables, Esther Prieto y Samuel Castro, mentes que pola discográfica integrada en Goxe Producciones participó Xune Elipe. Na so intervención, Prieto señaló que la iniciativa de la XDLA nun ye sólo “interesante, sinón que sal nel momentu xustu, porque nun hai qu’escaecer que tamos en momentos difíciles, tanto llaborales como económicos”. La responsable de Trabe defendió la merca de llibros n’asturianu “porque la xente pue da-yos valir en dos sentíos: al traviés d’ellos van atopar un regalu baratu y pa siempre, que permite nestos tiempos difíciles escaecer un poco la realidá; y en segundu llugar, porque d’esta crisis nun vamos salir al traviés de grandes empreses o grandes compañíes, sinón que vamos tener que volver a la empresa pequeña. Detrás de cada llibru que se compra hai una empresa, unos puestos de trabayu qu’hai que mantener pa nun siguir enanchando la cantidá de paraos d’esti país”.

Pela so parte, Elipe quixo agradecer el trabayu de la XDLA “porque vien a suplir un poco’l llabor que deberíen de tar faciendo les instituciones públiques asturianes, qu’en dalgún momentu fixeron coses asemeyaes a esta campaña que s’entama güei, pero que dende hai yá bien d’años vien desdexando bastante lo que ye la promoción de productos n’asturianu”. Sobre’l sector que representa apuntó que la crisis vien notándose dende muncho enantes de la crisis económica global d’anguaño que, “anque nun principiu paecía que nun afeutaba muncho a les producciones n’asturianu, dende va unos años sí vien apretando abondo”, aseguró. Nesi sen, apuntó qu’a les poques selmanes de salir al mercáu, un discu n’asturianu yá pue atopase na rede pa descargar de baldre, dalgo que tien “coses bones y males”. Asina, ye positivo pola posibilidá de que la música n’asturianu pueda espardise de forma global, pero negativo nel aspeutu de qu’estos discos lleven un trabayu detrás “nel que non sólo ta’l grupu; tamién los estudios de grabación, les fábriques de duplicación, los diseñadores…”, añade Elipe.

Per otru llau, otru aspeutu llaceriosu pal sector ye la falta d’espacios “onde poder dexar los nuesos productos pa que lleguen al públicu”. “Les grandes superficies nesti momentu tien acutáu un espaciu mínimu pa lo qu’ellos llamen ‘productu llocal’”, llamenta Elipe, qu’asegura que n’ocasiones “nun quieren nin el productu porque hai una direutiva dende la central, asitiada en Madrid o Barcelona, que diz que nun interesa”. “Entós atopámonos con que, per un llau, les grandes superficies nun recueyen esti tipu de productos y, pel otru,  munches de les tiendes pequeñes pesllaron”, frayándose asina la cadena ente la industria y el públicu al fallar la distribución.

Por esti motivu considera que non sólo hai qu’afalar a los asturianos a que compren productos en llingua asturiana, sinón que también había que llamar l’atención de “l’alministración y les grandes empreses pa que tuvieren en cuenta estos productos”, que’l cantante de Dixebra considera que tienen “una dignidá, un nivel y un altor estimable y, en dalgunos casos, superior al que se tán faciendo en castellanu n’Asturies”. Por último, Elipe destacó los precios reducíos que tanto editoriales y discográfiques suelen ufrir en comparanza colos llibros y discos que se venden nos grandes almacenes. “Merez la pena lleer y sentir música na llingua del país y mercar esti tipu de productos, non sólo como regalos, sinón como autoconsumu”, finó.

Baxada d’un 60 por cientu na venta de llibros

Tanto Prieto como Elipe, entrugaos pola prensa, falaron de les cifres concretes de descensu de ventes nos dos sectores. Nel casu del llibru, la responsable de Trabe esplicó que nos años 2008 y 2009 esti productu convirtióse “nel regalu refuxu”, lo que-y valió pa caltener el tipu, pero dende’l 2010 “podemos falar d’una pérdiga de venta del 50 al 60 por cientu”. La razón d’esti descensu, amás de pola crisis, tamién vien pol zarru de les pequeñes llibreríes especializaes, argumentó Prieto, qu’esplicó que les grandes “tienen el requexín del bable, pero non una circulación de llibros fluyida ente autor y llector”.

Amás apuntó al fechu de que l’Alministración mercaba tolos años a les editoriales una cantidá importante de llibros, que llueu pasó a comprar a les llibreríes –dalgo a lo que nun se mostró en contra–, y anguaño “lleva trés años ensin comprar realmente nada”. Darréu esplicó qu’hai dos meses enteróse de que dieran esti añu 200.000 euros a les biblioteques pa l’adquisición de llibros, una cantidá que mui probablemente destinaráse a comprar el Premiu Planeta en llugar de mercar productos de les editoriales asturianes, yá sían n’asturianu o en castellanu. “Pa equí quedarán migayes”, sospecha.

Nel casu del discu, Elipe faló de la esperiencia propia de L’Aguañaz, que tien cerca de 70 referencies nos sos 16 años de vida que, como poco, vendía 700 copies caúna. “Nesti momentu vender 500 discos ye pa tar satisfechos”, aseguró’l responsable d’una discográfica que llegó a distribuyir 7.000 copies de dalgún de los sos productos. “Hai ocho años 500 copies yera un fracasu estrepitósu”, recalcó.

Na semeya, Castro, Prieto, Pulgar y Elipe.