Corvera convoca’l Concursu ‘Carta a los Reis Magos n’Asturianu’

Como ye vezu por estes feches, el Conceyu de Corvera convoca’l Concursu ‘Carta a los Reis Magos n’Asturianu’, destináu a los escolinos y escolines de Primaria. El plazu pa la entrega de trabayos va terminar el vienres día 28.

El concursu consiste en dalgo tán tradicional por estes feches como escribir una carta a los reis magos, que yá tán preparando los sos camellos pa visitar a los neños y neñes d’Asturies na madrugada del 6 de xineru. Los escolinos de Corvera yá disponen d’éstes nos sos centros educativos y namái tienen que rellenales colos sos deseos y entregales nel Centru Sociocultural de Les Vegues enantes del vienres próximu. D’ehí van treslladase a oriente pa que puedan llegar a los reis magos a tiempu.

Les cartes que presenten un asturianu más correutu y sían más orixinales van optar a llevase’l premiu del concursu en cada una de les sos trés estayes –primer, segundu y tercer ciclu de Primaria–, consistente nun lote de llibros en llingua asturiana. Los ganadores recibirán la so recompensa nel polideportivu de Les Vegues, el día 5 tres la cabalgata, de les manes de Melchor, Gaspar o Baltasar. Esti concursu ta entamáu al traviés de la Casa de la Llingua-Serviciu de Normalización Llingüística de Corvera y trátase d’una actividá cofinanciada pol Conceyu y la Conseyería d’Educación, Cultura y Deporte.