Álvarez firma un llibru sobre la historia y les lletres de Dixebra

Esti xueves va presentase n’Avilés un llibru sobre la historia y les lletres de Dixebra, grupu que va ufrir un conciertu esti domingu na sala uviedina Tribeca. Francisco Álvarez firma esta obra entitulada ‘Un país llamáu Dixebra’.

El periodista xixonés, mui venceyáu a la banda, como amuesa que firmara delles lletres pal conxuntu avilesín y que fora’l responsable de los testos del llibru-CD ‘Dixebra. Cróniques d’un pueblu’, editáu por mor del decimoquintu aniversariu de la banda, ye tamién l’autor d’esti llibru que coincide colos 25 años d’esti grupu referente pa delles xeneraciones d’asturianos. En ‘Un país llamáu Dixebra. La historia y les lletres de la banda decana del rock n’asturianu (1987-2012)’, Álvarez fai un repasu a tolos discos espublizaos por Dixebra y recueye caúna de les lletres d’estos álbumes. Asina, dedica cada capítulu a un discu, rellatando la historia de la banda nesi tiempu.

Al final del llibru, d’edición cuidada, en tapa dura, con papel agüesao y semeyes en color, Álvarez inclúi una serie de lletres inédites y doce páxines con fotografíes históriques del grupu avilesín. El diseñu ye responsabilidá de Pixelbox, estudiu xixonés que tamién s’encargó del de la obra ‘'Mañana saldrá el sol. Manuel Preciado, una vida en  cinco años’, editáu d’igual forma por Ediciones Seronda, de la que ye responsable Álvarez xunto con Laura Tuero, mentes que la impresión fíxose na empresa avilesina Gráficas Rigel.

La primer ocasión nel que los siguidores de la banda van poder conseguri ‘Un país llamáu Dixebra. La historia y les lletres de la banda decana del rock n’asturianu (1987-2012)’, que se vende a un preciu de 15 euros, va ser esta tarde nel actu de presentación del llibru. Ésti va tener llugar nel avilesín Palaciu de Valdecarzana, a les 20 hores, y va contar cola presencia del autor y de los miembros de Dixebra, asina como la del conceyal de Cultura, Román Álvarez. Al final del eventu va procedese a una firma de llibros.

Conciertu n’Uviéu

Dixebra va despedir l’añu n’Uviéu con un conciertu esti domingu na sala Tribeca (21 hores), ciudá onde tornen depués de más de dos años. La banda va ufrir una actuación de cerca de dos hores de llargor nes qu’interpretará cantares de toles sos époques. El grupu lideráu por Xune Elipe ta preparando un set-list nuevu pa l’añu qu’entra qu’incorpora dellos temes que formarán parte del discu nuevu del grupu, asina que munches canciones van sentise per última vegada en direuto nesti conciertu. El preciu de les entraes pa presenciar l’espectáculu va ser de 10 euros, anticipada, y de 12, na puerta.