L’Anuariu de la Música Asturiana 2012 recupera’l CD recopilatoriu y presenta un diseñu renováu dafechu

Fiel a la so cita dende l’añu 2000, l’Anuariu de la Música Asturiana yá ta disponible nos puntos de venta habituales de la mano de Goxe Producciones. Esti númberu presenta un diseñu renováu dafechu y recupera’l CD que solía incorporar.

La edición del 2012, que dedica a Dixebra la portada por mor del so 25 aniversariu, presenta 94 páxines con una variedá grande de conteníos. Nel ‘Entamu’, los responsables de la espublización manifiesten el so enfotu de volver al orixe d’ella y recuperar los oxetivos colos que nació, amás d’afirmar que siguen “creyendo firmemente na necesidá d’un proyectu como ésti, no imprescindible de que la música del país tenga un órganu d’espresión, un escaparate onde amosar los sos llogros y esmoliciones, que dea una visión de conxuntu, que la refuerce interna y esternamente”. Darréu, los llectores van atopar entrevistes a la banda astur-chilena de folk Ta Fechu y a La Tarrancha, asina como al músicu Pablo Canalís, amás de reportaxes fotográficos del conciertu conmemorativu del venticinco aniversariu de Dixebra y de la sesta edición del Premiu al Meyor Cantar n’Asturianu, un informe sobre la baxada de conciertos y la so repercusión ente los grupos del país, comentarios sobre los discos nuevos de Mariluz Cristóbal Caunedo, Toli Morilla o Soncai System, y un diariu sobre’l procesu de creación, grabación y presentación del trabayu ‘Llume’ de Xera.

Otros conteníos destacaos son les reseñes sobre los festivales debutantes Arcu Atlánticu (Xixón) y Sol Celta (Avilés), asina como’l yá veteranu Intercéltico d’Occidente (Tapia), que vivió esti añu la so decimosesta edición. Completen l’anuariu delles firmes de sonadía, como les de Xosé Ámbas, Xandru Martino, Adolfo Camilo Díaz, Ignaciu Llope, Xicu Ariza, Alberto Álvarez Peña o Llorián García, y la seición habitual ‘Collecha’, que recueye toles producciones discográfiques, bibliográfiques y audiovisuales que tienen a la música tradicional asturiana o cantada n’asturianu como protagonista. Nesta ocasión, l’anuariu presenta tanto les d’esti añu como les del pasáu, yá que l’Anuariu de la Música del 2011, del que s’encargó Publicaciones Ámbitu, nun caltuvo esti apartáu.

El regresu de Xune Elipe como direutor, al pasar la cabecera a manes de Goxe Producciones, onde anguaño ta integrada L’Aguañaz, llevó tamién a la recuperación del CD que solía acompañar el volume. Asina, l’Anuariu del 2012 incorpora un discu de nome ‘Esbilla sonora 2011-2012’ que recueye ventidós temes de dellos estilos onde se repasa la producción d’estos dos años. Nél van poder sentise cantares de Mariluz Cristóbal Caunedo, Anabel Santiago, les bandes de gaites Camín de Fierro y Llariegu, Tuenda, Pandereteres de Fitoria, Asturiana Mining Company, Tejedor, Ta Fechu, Toli Morilla, Alfredo González, Soncai System, La Tarrancha, Fala Non Caduca, Dixebra o la Big Band de Xixón.

La xente interesao en facese con un exemplar del Anuariu de la Música Asturiana 2012, que tien un preciu de 5 euros, pue acudir a dalgún de los puntos de venta oficiales siguientes: L’Esperteyu (Uviéu); Trisquel, Llibrería Paradiso y Sestaferia (Xixón); El Cafetón y El Cabanón (Avilés); L’Abellugu, Habana y Musical Miler (Mieres); El Cuévano (Siero); Llibrería Asturias (Tinéu); La Esbilla (Villaviciosa); La Naveta (Nava); El Sabil (Santu Adrianu); y Caparina (La Pola Llaviana).