EMTUSA recupera la toponimia oficial de Xixón nos sos autobuses

Los cartelos electrónicos de los autobuses públicos de Xixón yá tornen a la normalidá. El xueves pasáu, tres la quexa fecha nos medios d’Iniciativa pol Asturianu, volvieron a utilizar la toponimia asturiana y eliminaron la castellana, non oficial.

El cambiu de xerencia na Empresa Municipal de Tresportes Urbanos de Xixón (EMTUSA) tres la llegada de Foro Asturias Ciudadano a la Casa Conceyu provocó’l desaniciu de los nomes asturianos de llugar, oficiales dende l’añu 2006, de los cartelos electrónicos y de la web, inclumpliendo la llegalidá vixente, dalgo que denunció n’agostu l’Asociación Cultural N’Ast. Dao que la situación nun camudaba, Iniciativa pol Asturianu metió una reclamación nel rexistru n’ochobre que tuvo una respuesta positiva dende l’alcaldía, anque los cambios nun se produxeron, lo que llevó al coleutivu que trabaya pola normalización del idioma a facer una denuncia pública nueva la selmana pasada, que tuvo ecu na prensa. Trés díes depués, el xueves, la toponimia oficial yera la que podía vese nos autobuses d’EMTUSA, anque non na web.

“Ye llamentable que lo que más funcione seya salir nel periódicu, cuando fiximos tolos intentos al traviés de los responsables políticos y de xestión pa que se corrixera’l problema”, señala’l presidente d’Iniciativa pol Asturianu, Inaciu Galán, que camienta  que’l Conceyu de Xixón “habría meyorar la so respuesta a los problemes que surdan en cuestiones llingüístiques y que’l Conseyu Asesor valga pa más que pa vese les cares mui de cuando en cuando”. Precisamente una reunión del Conseyu Asesor foi’l mediu utilizáu pol coleutivu pa conseguir bones pallabres de Carlos Rubiera, conceyal d’Educación, Cultura, Mocedá y Fiestes, enantes de meter la quexa nel rexistru al nun deteutar cambios na política llingüística d’EMTUSA.

Tres esta bona noticia, Iniciativa pol Asturianu asegura que va siguir trabayando pa que que se dean más pasos alantre no que respeuta a la política llingüística de Xixón, “porque la mayoría les conceyalíes nun usen la toponimia oficial en toles ocasiones, y amás l’usu del asturianu ye anecdóticu en toes elles”. Pa la organización “tenemos que trabayar por que se cumpla la normativa afitada al traviés d’una Ordenanza Municipal d’Usu del Asturianu nel ámbitu del Conceyu de Xixón, que lleva yá unos años aprobada y sigue ensin cumplise”.

Na semeya, un autobús d'EMTUSA de la llinia 6 col topónimu oficial Xove y la forma incorreuta Porceyu en cuenta de l'aprobada Porceyo.