La Comisión de Facienda sobre los presupuestos de Fomentu acaba con una discusión ente PSOE y Foro

"Siento vergoña por veme en tan llamentable espectáculu”, señaló la conseyera Belén Fernández tres la so comparecencia pa presentar los presupuestos de Fomentu. Calificó de “bronquista” l’actitú de los diputaos de Foro de Ciudadanos.

"Vine con la intención sana d’esplicar les previsiones de gastu y marcho cola impresión triste de que naide que quixera sanamente enterase lo llograra", añadió Fernández. Les pallabres de la conseyera atoparon respuesta na presidenta de la Comisión, la forista Esther Landa, que respondió que llamentaba que se fuera sintiéndose mal. "Yo soi novata nesto, pero viví les comparecencies del añu pasáu y, en comparanza con aquelles, ésta foi mui suave", dixo, sicasí, en referencia a les intervenciones que realizaron los conseyeros de Foro l’añu pasáu cuando taben nel Gobiernu.

El malestar de la conseyera mientres la Comisión principió col turnu de preguntes del diputáu forista Pelayo Roces. Ésti fixo-y entregues concretes y esixía-y respuestes concretes y non "mítines políticos". Na mayor parte d’ocasiones, Roces interrumpía-y con un "gracies, conseyera", y plantegaba-y otra pregunta. El nivel de tensión foi medrando y la vicepresidenta de la Comisión, la socialista Pilar Alonso, sentada al llau de Landa, pidia-y qu’interviniese y recriminaba a Roces, al que tenía enfrente, la so actitú. "A ver si se calla la señora que tien al llau, presidenta, porque güei vien revoltosa", llegó a dicir Roces a Landa. Darréu, Alonso tildó de "machista" al diputáu y la conseyera quexóse mientres la so intervención diciendo que veía atacáu’l so derechu a espresase de forma llibre, al entender que nun-y taben dexando contestar.

Tuvo qu’entrar nel salón onde se celebraba la Comisión el voceru del grupu parllamentariu socialista, Fernando Lastra, que tomó la pallabra y solicitó a la presidenta, como permite’l reglamentu, una pausa de cinco minutos, a lo que Landa accedió. Fuera de la sala, los diputaos socialistes foron rápido a quexarse al lletráu de la Comisión polo asocedío. Alonso dixo-y que los diputaos de Foro yeren unos "bronquistes". Al final, la Comisión reanudóse cinco minutos depués cola fixación de posiciones de los distintos grupos parllamentarios.

El 40 por cientu de les cuentes, pa carreteres

El gastu total de la Conseyería de Fomentu, Ordenación del Territoriu y Mediu Ambiente será de 163.238.552 euros, de los que 24,8 millones destínense a gastos de personal; 13,3 millones a bienes corrientes y servicios; 29,3 millones a tresferencies corrientes; 79,5 millones a inversiones reales; y 16,3 millones a tresferencies de capital. Pela so parte, la Xunta de Saneamientu tien un presupuestu de 72.039.266 euros.

El 40 por cientu de les cuentes van al apartáu de carreteres, con 79.881.582 euros presupuestaos. Pa les llicitaciones pa los accesos a la Zona d’Actividaes Loxístiques y Industriales d’Asturies (ZALIA) pela zona d’El Monticu y La Peñona, el Gobiernu destina 700.000 euros l’añu próximu.

Na semeya, los diputaos que participaron na Comisión discuten fuera de la sala.