Iniciativa pol Asturianu reclama una Llei d’Etiquetaxe tres la eliminación de les ayudes a empreses

La decisión del Gobiernu socialista de desaniciar les llinies de subvención pa empreses, asociaciones y actividaes cinematográfiques pol usu del idioma, indigna a Iniciativa pol Asturianu. L’asociación reclama una Llei d’Etiquetaxe.

Los presupuestos del Executivu asturianu del PSOE –sofitaos por Izquierda Xunida y UPyD–, que presenten na estaya de Cultura una mengua cercana al 14 por cientu no que se refier a la promoción del idioma, suponen pa Iniciativa pol Asturianu “un ataque al texíu asociativu y empresarial que s'espresa en llingua asturiana. Cuéntase con desaniciar les llinies de sovenciones en concurrencia competitiva p'asociaciones, empreses y p'actividaes cinematográfiques, dalgo que se fizo d'espaldes a tol coleutivu asturfalante y ensin posibilidá nenguna de negociación”. El coleutivu que trabaya pola normalización del asturianu considera que yeren necesarios cambios, pero “nun ye d’esta manera como han facese”. “Tien de tenese en cuenta a los afectaos y escuchase toles voces, non acabar coles ayudes de forma unillateral y ensin alternatives. D'esta miente va tocar la llinia de flotación de munches empreses del sector cultural n'asturianu, como les editoriales, que yá taben pasando la so propia crisis y van ver amenorgaes les sos posibilidaes de visibilización de la so producción”, añade. Sicasí, ve con bonos güeyos la medra d’otres partíes del presupuestu, faciendo referencia a la importancia d’apoyar el sector musical.

Como respuesta a esta situación, que va afeutar enforma a les empreses que veníen etiquetando en llingua asturiana, Iniciativa pol Asturianu reclama la creación d’una Llei d’Etiquetaxe, esto ye, “una proteición llegal”, yá esistente n’otros territorios, “pa que les empreses que lo deseen puedan etiquetar esclusivamente n'asturianu y asina reconocer los derechos llingüísticos de les y los falantes del nuestru idioma, asina como apoyar l’etiquetaxe billingüe y l’usu del asturianu nel sector priváu con midíes que pueden salir a costu cero y dar importantes frutos na normalización del idioma”.

Na semeya, Ana González –segunda pela derecha–, conseyera d'Educación, Cultura y Deporte, nun momentu de la reunión de la Comisión de Facienda de la Xunta Xeneral, onde presentó'l martes les cuentes del so departamentu pal 2013.