Marinas gana’l Premiu Alfonso Iglesias de cómic por ‘Homes’

Javier Antonio Marinas García llevóse’l IV Premiu Alfonso Iglesias de cómic en llingua asturiana por ‘Homes’. El xuráu del gallardón qu’entrega Cultura decidióse por unanimidá pol trabayu del dibuxante y diseñador nacíu en Grau.

Ana María Fueyo Llaneza, direutora de Política Llingüística, presidió’l xuráu formáu polos especialistes de cómic Isaac del Rivero –ganador últimu del premiu–, Ruma Barbero y José Antonio García Fernández y aconceyáu na sede de la Conseyería d’Eduación, Cultura y Deporte. Los miembros del mesmu escoyeron ‘Homes’ por ser una obra de gran valor didácticu que destaca pol tratamientu dixital de les imáxenes. El testu presentóse baxo l'alcuñu de 'El Rapiegu'.

A lo llargo de la so trayeutoria, Marinas García ganó numberosos premios d'ilustración y cartelismu, ente ellos el Premiu Urriellu d'Ilustración convocáu pola Conseyería de Cultura, Deportes y Mocedá nes ediciones del 1991 y 1992, o’l Primer Premiu d'Ilustración a nivel estatal concedíu pola Universidad Popular de Castuera (Badajoz) nel 1995. Dos años depués espublizó'l so primer llibru, 'Ballenes' –historia ambientada na Asturies del sieglu XVI–, al que siguieron, nel 2005, 'Domno' –novela gráfica histórica centrada nes rebeliones de Gonzalo Peláez– y, nel 2011, 'Pedro Menéndez d'Avilés' –rellatu sobre la fundación de la primer ciudá d'Estaos Xuníos, San Agustín de la Florida–.