Ruma Barbero espubliza una novela gráfica sobre El Salvador

‘La Chelita. El Salvador 1992’ ye’l nome del trabayu últimu de Ruma Barbero. Trátase d’una novela gráfica desendolcada a partir de los testimonios de cooperantes y veteranos de la guerrilla, y centrada na figura de Charo, ‘La Chelita’.

Esta obra, en llingua asturiana, surdió del deséu del dibuxante y músicu xixonés de contar la esperiencia de Charo, una amiga salmantina llicenciada en psicoloxía que trabayó como cooperante nel país centroamericanu, tres conocer detalles de la so estancia nel llugar y el so trabayu de recopilación de datos pal Informe para la Comisión de la Verdad para El Salvador de les Naciones Xuníes. ‘La Chelita’ viaxó nun primer momentu a ‘El Pulgarcito’, nome como se conoz na zona a El Salvador pol su tamañu pequeñu, pa trabayar na formación de profesores, pero la casualidá llevóla a collaborar cola organización pro-derechos humanos Madeleine Lagadec na ellaboración del informe qu’investigaba les violaciones más graves contra los derechos fundamentales del ser humanu mientres la Guerra Civil que vivió’l país ente’l 1980 y el 1992.

El llibru, de 160 páxines, avera a los llectores esta historia tráxica del, pa munchos desconocíu, país centroamericanu y recueye testimonios autobiográficos y esperiencies humanes cola guerra y cola paz. Barbero decidió dividir la novela en trés partes: ‘El Salvador’, ‘La Chelita’ y ‘1992’. La primera trátase d’una esplicación del autor de cómo s’anició’l proyeutu y d’un repás a la historia d’El Salvador, solliñando los tiempos de la Guerra Civil. Darréu, el dibuxante xixonés cuenta la historia de Chelo, p’acabar centrándose nel añu de la firma de los ‘Acuerdos de Paz de Chapultepec’ ente’l Gobiernu salvadoreñu y los guerrilleros del Frente Farabundo Martí para la Liberación Nacional.

Les persones interesaes en conocer dalgunos adelantos de ‘La Chelita. El Salvador 1992’ pueden acudir al fanzine dixital ‘Aguantando cachones’ de Barbero, qu’esta selmana va presentar esta obra espublizada por Tierra Llibros n’Avilés, Xixón y Uviéu. Esta tarde, a les 20 hores, va dedicar exemplares nel avilesín El Cafetón (Del Sol, 8), mentes que mañana va tar nel xixonés Toma 3 (Marqués de Casa Valdés, 27) a partir de les 21 hores. L’actu va consistir nuna charra y una proyeición, y cuenta col sofitu de la Coordinadora d’ONGD del Principáu d’Asturies (CODOPA). Completa l’axenda de Barbero otru eventu, nesti casu’l miércoles na uviedina Malayerba (cai Alfonso III El Magno) a partir les 20.30 hores, que tamién va consistir nuna charra y una proyeición.