Dixebra y Ediciones Trabe lleven El Pegollu de los Premios Andrés Solar

La XDLA decidió conceder a Dixebra y a Ediciones Trabe El Pegollu de los Premios Andrés Solar d’esti añu, que se van entregar el día 15 en Xixón. Los recortes en materia llingüística y la ‘Llei Wert’ foron merecedores d’El Madreñazu.

Los Premios Andrés Solar, que viven la so vixésimooctava edición, creáronse pa reconocer a una persona o entidá pol so llabor na defensa y promoción de la llingua asturiana y, al mesmu tiempu, a aquellos que rescamplaren polo contrario. Asina, la Xunta pola Defensa de la Llingua Asturiana (XDLA) entrega El Pegollu o El Madreñazu, de manera respeutiva. Pal 2012, el coleutivu cívicu quixo premiar, ex aequo, a Dixebra nel so vixésimoquintu aniversariu, y a Trabe, nel so vixésimu, al consideralos “proyeutos fundamentales pa entender el desarrollu cultural, social y económicu de la llingua asturiana nes últimes décades”. Tamién “pol so apueste decidíu pola música y lliteratura a lo llargo de bien d'años, demostrando que l’asturianu ye una ferramienta útil y necesaria nel rellatu de la contemporaneidá d'Asturies”. D’esta forma, tomen el revelu nestos gallardones de Bodegas Obanca, onde se fai’l vinu Ḷḷumés, el primeru n’etiquetase n’asturianu.

La vertiente negativa del premiu, El Madreñazu, foi nesta ocasión, tamién ex aequo, pa los recortes en materia llingüística y pa la ‘Llei Wert’. “Nos últimos años, con diferentes gobiernos y cola pasividá de los grupos parllamentarios, tamos asistiendo a la aplicación d’un programa sistemáticu de desmantelamientu del texíu cultural y mediáticu n’asturianu. No que cinca a la llamada Llei Wert, solo hai que dicir qu’introduz brutales modificaciones que puen suponer un peligru de desaniciu de la enseñanza de la llingua, que yá ta nuna situación de marxinación llaceriosa”, esplica la XDLA. L’añu pasáu, el ‘premiáu’ foi César Movilla, alcalde de Noreña.

La entrega de los XXVIII Premios Andrés Solar va tener llugar el sábadu 15 d’avientu, a les 19.30 hores, nel salón d’actos del xixonés Antiguu Institutu cola participación de Dani Stylo, que va facer reellaboraciones de cantares históricos de Dixebra. Tres esti eventu, la XDLA entama la tradicional espicha, que repite na Sidrería Canteli. El preciu pa participar nella ye de 20 euros y ye necesario confirmar asistencia enantes del xueves nel teléfonu 985.22.95.53 o nel corréu electrónicu info@exunta.org.