Compromisu por Asturies califica de “pantomima” el decretu aprobáu por PP y UPyD sobre los desagospios

El xueves pasáu, el PP sacó alantre’l decretu sobre los desallugos col apoyu del so sociu UPN y por UPyD. Compromisu critica la posición d’estes formaciones y califica de “pantomima” l’aprobación d’un testu “dictáu” pola banca.

Según señaló Yolanda Huergo, vocera de la federación de partíos, “ye un insultu pa les persones que se ven afectaes anguaño, y pa les que lo tarán nel futuru, calificar de plan paralizador” a un conxuntu de midíes que foron “dictaes, dende la primera hasta a la última coma, polos dirixentes de les grandes entidaes bancaries”. Compromisu por Asturies entiende que lo que más interesó con esti decretu “foi velar porque los bancos nun vean amenorgaos los sos intereses”. La votación nel Congresu salió alantre colos 185 votos de PP, UPN y UPyD, y el refugu de 146 diputaos. Foro de Ciudadanos y Coalición Canarias-Nueva Canarias, astuviéronse.

“Esti decretu nun regula de nenguna de les maneres la dación en pagu nin la paralización de los intereses de demoranza mientres los dos años  de moratoria. Por tanto, y una vegada escosáu esi plazu, les persones van atopase sí o sí con una delda que nun dexó de crecer en nengún casu, amás d'escaecese de manera nidia y evidente, de la denuncia que per parte de l'abogada xeneral de la Xunión Europea se fixo sobre la desproteición xurídica y llegal que sufren les persones en situación de desagospiu, a les que l'ordenamientu xurídicu vixente dexa nuna situación d'indefensión absoluta”, añade Huergo, qu’apuntó que namái “el 2 por cientu de la población va poder sumáse, si asina lo quier, a esti plan dao lo restrictivo de los requisitos personales solicitaos”.

Compromisu por Asturies defende nesti asuntu “que se tengan en cuenta les reivindicaciones de la sociedá, que pasen pola asunción per parte de los bancos de la dación en pagu, amás del establecimientu de moratories firmes y series onde los intereses nun aumenten al 27 por cientu como asocede anguaño, amás de la redacción y aprobación d'una nueva Llei de la Propiedá Hipotecaria y otra d'Enxuiciamientu Civil que protexan los derechos de les persones, ensin escaecer la necesidá de reestructurar en fondura un sistema bancariu y financieru que ta afogando ensin reconcomiu dalgunu a les persones trabayadores”.