Iván G. Fernández: “Ésti ye un país pequeñu con proyectos creativos d’una calidá descomanada”

La revista cultural Post Magazine nació pa sirvir d’altavoz a los creadores asturianos. Iván G. Fernández (Uviéu, 1978) ye’l direutor de conteníos d’esta espublización qu'utiliza les trés llingües que se falen n’Asturies.

¿Qué ye Post Magazine?

Ye una revista cultural, en formatu papel y dixital, que trata d’ufiertar una alternativa editorial que se diferencie del restu de publicaciones, tanto nel fondu como na forma. En papel tien una periodicidá bimestral y no dixital pue consultase a dirario na páxina www.postmagazine.es.

Creemos que n’Asturies hai un gran potencial no creativo no que se refier al mundu cultural. Anque ésti ye un país pequeñu, la calidá de los proyectos que se faen equí ye descomanada, tanto na música, na lliteratura, el cine, teatru, diseñu o fotografía. Y por eso queremos ser l’altavoz d’esos creadores y dar a conocer les sos creaciones.

¿Quién ta detrás d’esti proyeutu?

Detrás de tou esti entramáu ta Maniac Estudio Multimedia, o lo que ye lo mesmo, Pedro Núñez-Cacho Fuentes, director técnicu, y Eduardo Carruébano, director creativu. Maniac Estudio ta especializada en diseñu web y editorial, aplicaciones móviles, identidá corporativa, tiendes online o gráfica publicitaria, ente otres coses. Depués, la tercer ‘pata’, por dicilo de dalguna manera, soi yo, que namás m’encargo de coordinar la revista.

¿Por qué apostaron pola ellaboración d’una revista d’esti calter?

Quiximos apostar por esti tipu de publicación porque pensamos que yera necesario. Ye verdá qu’hai munches revistes culturales n’Asturies y de calidá, pero nenguna se paez a la nuestra. El proyectu de Post Magazine empezó a xestase hai unos meses porque a los trés atraíanos la idea de llevar alantre algo asina. L’orixe ta claro que ta en Maniac Estudio y, depués, ellos contactaron conmigo. Llevar alantre una publicación ye una xera complicada y más, si ye de baldre y tenemos en cuenta la coxuntura económica que tamos viviendo.

De la qu’entamemos xurdieron munches duldes: si díbemos ser quien a ello, si diba pagar la pena, la manera de financiación... Pero na balanza de pros y contres tuvieron más pesu les ganes y el querer facer un bon trabayu. Esto último nun sé si lo consiguimos, pero lo que ta nidio ye que tamos satisfechos de lo fecho y nestos díes tamos preparando yá’l segundu númberu, que saldrá pa mediaos de xineru

Post Magazine ye una revista de baldre que depende de la publicidá. Nestos tiempos de crisis económica, ¿resultó-yos mui complicao atopar anunciantes?

La verdá ye que nunca ye fácil pidir, eso ta claro, y, sobre manera, cuando ún entama de cero y quies que confíen en ti; nel to productu. La publicidá ta nun momentu difícil y paezme que ye necesariu un cambiu nel modelu. Hai tiempu, cuando nun esistía esti contextu de ‘crisis económica’ nun se miraba lo que se pagaba por un anunciu; por un diseñu, anque fuera de poca calidá creativa; agora, los anunciantes, les empreses, miren muncho más poles perres, pero non pola calidá del diseñu. Ta nidio que los precios de la publicidá tán pel suelu y nesi contestu hai que consiguir munchos anunciantes.

Nuna primer güeyada a la espublización destaca’l so diseñu y maquetación y una variedá importante de conteníos.

Desque quiximos llevar alantre esta idea tuvimos claro que l’apariencia xeneral de la revista tenía que ser atractiva pa los llectores, pero non namás nos conteníos, sinón tamién nel diseñu y na so estructura. El formatu en 17x24 llama muncho l’atención; ye mui manexable y apártase del recurrente DIN A4 o d’otros formatos mui utilizaos. La portada d’esti primer númberu ye mui llamativa y ta teniendo muncha repercusión. Trátase d’un diseñu esclusivu fechu pol ilustrador asturianu Juan N. Cabal.

Dalgo que queremos mantener nesti proyectu ye que la portada de Post Magazine sía impactante, porque ye lo primero que se ve y, polo tanto, tien que llamar l’atención del llector. Depués, ta nidio que los conteníos son mui importantes y hai que buscar esi equilibriu ente lo ún y lo otro. Nun val de nada un conteníu maraviyosu si la maquetación ye un desastre; y al revés.

Decidieron nun quedase namái nel soporte físicu. ¿Trátase ésti d’un modelu caducu?

Nun toi d’alcuerdu. De nenguna manera les publicaciones en papel son un fenómenu caducu y niégome a aceptar toda esa corriente de pesimismu que se vien xenerando dende hai unos años alredor de la desapaición de les publicaciones en papel. Agora bien, tampoco podemos ciarrar los güeyos y mirar pa otru llau en cuantes a les nueves tecnoloxíes. Too suma y se pue complementar lo ún colo otro. Eso ye lo que queremos facer en Post Magazine: conectar el papel colo dixital. Y ye que la principal novedá de la revista ye la so capacida d’interacción col llector. Hai dellos reportaxes, entrevistes o conteníos nos que los llectores van poder tener accesu a conteníu esclusivu al traviés de códigos QR. Con un smartphone pue capturase esti códigu y, de forma automática, accederá a, por exemplu, un videu d’una entrevista, un momentu d’un conciertu... Son munches les posibilidaes. D’esta manera, la revista en papel tien un rol más importante de lo que ye vezu, porque dende ella va poder accedese a una serie de conteníos ‘estra’ que d’otra manera nun diba ser posible visualizar.

Como-y esplicaba enantes, el fin d’esta publicación ye dar a conocer l’actividá cultual que se fai ‘en casa’, pero con una perspectiva innovadora que la diferencie del restu de publicaciones. Polo tanto, l’usu de la tecnoloxía móvil ye fundamental nesti procesu, de la mesma manera que lo ye la so versión dixital, que s’actualiza diariamente con conteníos culturales.

¿Qué estayes trabayen na revista?

Toles que tengan que ver cola cultura. Dende lliteratura, cine, arte, audiovisual, música, fotografía... La llista diba ser infinita. Pero, sobre manera, valoramos la calidá de los trabayos y de los artistes, que son munchos y mui bonos.

¿Quiénes van tener güecu nes sos fueyes y soportes dixitales?

L’enfoque principal son los artistes del país, anque nun por ello vamos dexar de llau a otros creadores del Éstáu y d’otros sitios. Nosotros vamos tar pendientes de lo que se va faciendo nel ámbitu cultural asturianu y de fuera d’Asturies pero, al empar, queremos convidar a los creadores y artistes a que nos faigan llegar los sos trabayos y que contacten con nosotros, porque tamos interesaos no que faen y no sos proyectos. Tamién quería aprovechar pa convidar a los anunciantes a que confíen en nosotros y nos apoyen económicamente, porque ensin ellos esto nun pue ser una realidá.

Post Magazine trátase d’un proyeutu que nun escaez l’asturianu nin el gallego-asturiano.

Les llingües que se falen n’Asturies son una realidá, vivimos con elles y comunicámonos al traviés d’elles, anque munchos tean interesaos en tapar esta realidá. En Post Magazine les trés realidaes llingüístiques d’Asturies, asturianu, gallego-asturiano y castellanu, conviven con total naturalidá porque nun pue ser d’otra manera. De nun ser asina, taríemos mintiéndonos y engañándonos a nosotros mesmos y a los llectores, anunciantes... ¿Cómo pue ser qu’una revista cultural, si ye asturiana y considérase como tal, nun-y dea espaciu nes sos páxines –en papel o dixitales– a esta realidá llingüística? Precisamente esti fechu, el llingüísticu, el de la normalización, ye otra de les señes d’identidá de Post Magazine que nos diferencia del restu de publicaciones. Y nes nuestres páxines úsase cualquiera de los trés idiomes con total normalidá pa tratar de cualquier tema, porque asina pensamos que tien que ser y asina ha tener que ser en tolos ámbitos, non namás nel cultural, d’Asturies.

Estes selmanes presentaron el primer númberu. ¿Qué van atopar los llectores nél?

La revista tuvo dos presentaciones en feches y sitios distintos. La estrena, pura y dura, fíxose nel Toma 3 de Xixón, con mui bona acoyida y muncha xente. Y la segunda puesta de llargu foi n’Uviéu, nel local La Caja Negra, tamién con mui bones vibraciones.

En cuantes a los conteníos, nun me presta resaltar nengún porque toos son importantes y nun hai que desmerecer nada nin a naide. Si tengo que destacar dalguna cosa ye’l conxuntu en sí de la publicación y, sobre manera, les collaboraciones, que son muches y de firmes con muncha calidá y trayectoria. Yá tamos trabayando nel segundu númberu que va ser un retu nel sentíu de poder igualar al primeru, pero que va contar tamién con conteníos mui atractivos y con collaboradores esceicionales.

¿Tán recibiendo bones crítiques?

Falar de les crítiques nun ye dalgo que me correspuenda a min porque nun diba ser oxetivu. Lo que nos ta llegando, los bilordios de chigre que se cuecen perhí, son positivos; polo menos ta falándose de la publicación. Hai munches coses meyorables, seguramente tenemos errores, pero pasu ente pasu, vamos meyorando y creciendo.

¿En qué puntos físicos va tar disponible pal públicu la revista?

Post Magazine ta presente, de momentu n’Uviéu, Xixón, Avilés, Mieres y Llangréu. En cuantes a sitios concretos, pue atopase nes cases de cultura d’estos conceyos, en biblioteques públiques, la Llaboral y el Centru d’Arte y Creación, Centru Cultural Niemeyer, escueles d’Arte... Y depués en dellos locales y pequeñu comerciu, como, por exemplu, La Caja Negra, El Último Mono y La Mala Yerba (Uviéu); Toma 3 y Librería Paradiso (Xixón); El Cafetón (Avilés); o Ewan (Salinas).

Semeya fecha por Eduardo Carruébano.