Les actividaes al rodiu del Liet International van principiar el vienres con una conferencia n'Uviéu

El sábadu, a les 21.15 hores, va tener llugar na Llaboral el festival Liet International. Sicasí, les actividaes paraleles van principiar el vienres cola conferencia ‘Les llingües minoritaries n'Europa. La música y la cultura como elementu recuperador’.

Ésta va tener llugar nel salón d’actos de la Biblioteca de la Facultá de Filosofía y Lletres de la Universidá d’Uviéu, a partir de les 10.15 hores, cola participación del direutor del Secretariáu de la Carta Europea pa les Llingües Minoritaries del Conseyu d'Europa, Alexey Kozhemyakov; el direutor de Gaelic Arts & Cultura y representante d’Alba nel concursu, Brian Ó hEadhra; la presidenta de l’Academia de la Llingua Asturiana, Ana María Cano; l’autor del llibru ‘Rock music in minority languages’ y investigador del friulanu, Marco Stolfo; y la direutora de Política Llingüística, Ana Fueyo. El primeru en tomar la pallabra va ser Kozhemyakov, pa falar de ‘La Carta Europea pa les Llingües Rexonales y Minoritaries 1992-2012. Venti años depués. Llogros y nuevos retos’, pa continuar el representante escocés, que va analizar el desarrollu de la cultura gaélica n’Alba. Pela so parte, Cano va tratar sobre la ‘Normativización y normalización de la llingua asturiana’ y Stolfo de les ‘Llingües que roncaroleen y músiques fuertes na Europa unida na diversidá’. Por último, Fueyo va esponer la ‘Evolución de la música n'asturianu nes últimes décades. Apoyu institucional y Liet International 2012’, pa depués zarrar l’actu Ó hEadhra con una actuación musical.

Pela tarde, nel Valey Centru Cultural de Castrillón, ta previsto un conciertu de los representantes de Fryslân y Breizh nel Liet International, esto ye, Yldau y Lleuwen, de manera respeutiva, amás del propiu Ó hEadhra. Les actuaciones, que tienen entrada de baldre hasta completar l’aforu, van principiar a les 20.30 hores  

L’actividá del sábadu yá va centrase dafechu na Llaboral. A les 12.30 hores va proyeutase nel paraninfu el documental ‘Lingue in Musica’, que va ser presentáu pol so direutor, el friulanu Marco d’Agostini. Amás, les persones que s’averen a esta instalación xixonesa van poder disfrutar nel patiu, a partir de les 11 hores, de la V Copa Cantábrica de Liriu qu’enfrenta a les seleición d’Asturies d’esti deporte tradicional cola gallega de billarda. Hasta’l momentu, Galicia suma trés títulos d’esti tornéu por ún del nuesu país. Mentes, pela tarde, va tener llugar una conferencia-taller sobre’l proyeutu Hiahoka (18 hores), p’aprender eusquera mediante’l cantu.

Once participantes

L’actu principal d’estes dos xornaes va ser, como nun podría d’otra mena, el Liet International, nel que van participar once artistes o bandes en representación de dellos territorios europeos con llingua propia. La llista de competidores ta compuesta por: Asturiana Mining Company (Asturies), col cantar ‘Si nun conoces Vaḷḷouta’; Claudia Crabuzza y Claudio Gabriel Sanna (L’Alguer); Jo No Kongnos (Friûl); Enkore (Euskal Herria); Yldau (Fryslân); The Voodooeletric (Neddersassen/Saxonia Baxa); Lleuwen (Breizh); Ivan Belosludtsev & 4cp (Udmurt Elkun); Inger Karoline Gaup (Sami); Dopu Cena (Còrsica); y Brian Ó hEadhra (Alba). Tamién ta anunciada l’actuación de Dixebra, fuera de concursu, mientres el discutiniu del xuráu.