Cayarga repite como Premiu Críticu de les Lletres Asturianes, nesta ocasión na estaya de narrativa

Xabiero Cayarga fai doblete nos Premios Críticos de les Lletres Asturianes de la XDLA. Ganador del gallardón na estaya de poesía, el xuráu responsable de fallar el de narrativa concediólu al cangués pola so obra ‘El sol negru de Wewelsburg’.

Eloy Antuña, Pablo Suárez y Inaciu Llope alcordaron, por unanimidá, otorgar el premiu a esta obra espublizada por Trabe pol “usu depuráu del llinguaxe y l’equilibriu de la so prosa”. Na novela, Cayarga introduz al llector, dende la perspeutiva d’un emigrante asturianu, nel contestu de les derivaciones neonazis de la clase obrera alemana, que lleven al protagonista a implicase nun grupúsculu d’activistes violentos y apoderaos de la mística ocultista al rodiu de la supuesta raza aria.

Tres esti fallu, yá se conocen les cuatro obres ganadores d’unos premios convocaos, de manera esceicional, pola Xunta pola Defensa de la Llingua Asturiana (XDLA) como respuesta a l’ausencia de la llingua asturiana nos XIII Premios de la Crítica que convocó l’Asociación d’Escritores Asturianos: ‘La mio hermana ye una mofeta’, de Berta Piñán, na estaya de lliteratura infantil y xuvenil; ‘La ñeve del cuquiellu’, de Cayarga, na de poesía; 'De totalitarios a «demócrates». Franquismu, fascismu y nazismu na II Guerra Mundial al traviés del diariu xixonés Voluntad’, de Pablo Rodríguez Alonso, na d’ensayu; y ‘El sol negru de Wewelsburg’, de Cayarga, na de narrativa. Esti vienres, a les 19.30 hores na galería d’arte uviedina El Texu, va tener l’actu d’entrega de los Premios Críticos de les Lletres Asturianes. Tres el mesmu, va convidase a los presentes a Vinu de Calidá de Cangas Ḷḷumes y a quesu Afuega’l pitu Cá Sanchu.