Espectativa pol resultáu de la votación sobre la llingua en Maxisteriu

Mañana ye'l día nel que la Xunta d'Escuela de Maxisteriu va decidir si la llingua asturiana va tener una Mención nos planes d'estudios. Dende los sectores de profesores y estudiantes que tán puxando por algamar un resultáu positivu vese la votación con un "optimismu moderáu".

 
La Xunta pola Defensa de la Llingua Asturiana ye la organización que lleva selmanes trabayando con una campaña informativa, especialmente ente los alumnos de Maxisteriu, a la gueta d'apoyos que permitan que l'asturianu pueda tar presente nos planes d'estudios. L'asociación de defensa de la llingua fixo les últimes xestiones a finales de la selmana pasada, con una última entrevista col rector y tola selmana tuvo presencia na Escuela de Maxisteriu. Dende la Xunta recálcase que la percepción xeneral ye positiva porque la presencia de la llingua asturiana nun perxudica a naide y ye necesaria pa cumplir la llegalidá. Per otru llau, dellos grupos de profesores de Maxisteriu, Filoloxía y Pedagoxía tuvieron nos últimos dies buscando apoyos pa la votación de mañana y en xeneral coincídese nun "moderáu optimismu"
Per otru llau nes últimes hores tamién el colectivu universitariu CUPA, axuntóse a los partíos, sindicatos y asociaciones que pidieron l'aprobación d'esta decisión cola que "va dase un nuevu pasu hestóricu pal asturianu y pa la Universidá d’Uviéu".