Los estranxeros que merquen viviendes de más de 160.000 euros recibirán el permisu de residencia

El Gobiernu estatal dará’l permisu de residencia a aquellos estranxeros que merquen una vivienda d’un valor superior a los 160.000 euros. L’oxetivu ye reducir el númberu de pisos en ‘stock’ y reactivar la demanda esterior.

"Nunes selmanes va ponese en marcha una reforma del Decretu d'estranxería pa conceder permisos de residencia n'España a estranxeros qu'alquieran una vivienda a partir d'un nivel de preciu", indicó Jaime García-Legaz na so intervención en 'El Ágora' del portal financieru El Economista. El secretariu d'Estáu de Comerciu apuntó a los 160.000 euros como la llenda de preciu de los pisos que se fixaría nesta midida, un importe qu'estima "equilibráu". "Nun pue ponese un preciu más baxu porque xeneraría una demanda masiva de permisos de residencia", señaló al respeuto.

No referente a los destinatarios, Gargía-Legaz considera que los mercaos rusu o chinu son nos que se detecta "una demanda importante de vivienda n'España". Según comentó, trátase d’una iniciativa na que trabayen dende la primavera pasada los ministerios d'Emplegu, Fomentu, Interior y Asuntos Esteriores col oxetivu d'amenorgar el 'stock' de pisos qu'esiste nel Estáu, onde nesti momentu nun hai muncha capacidá de compra pola "falta de creitu".