El llunes principia n'Uviéu un cursu d’asturianu entamáu pola XDLA

La Xunta pola Defensa de la Llingua Asturiana (XDLA) entama un cursu d’asturianu básicu n’Uviéu que principia'l llunes. Ésti ta dirixíu, sobre manera, a persones adultes que quieran garrar un bon nivel del idioma, tanto a nivel oral como escritu.

El cursu va tar compuestu por 60 hores llectives repartíes los llunes y miércoles n’horariu de 19 a 21 hores. El preciu completu de matrícula ye de 20 euros, pa socios, y de 30 pal públicu, siendo sede de les clases el llocal de Conceyu Abiertu, asitiáu na cai La Gascona númberu 12. Hai que destacar que la XDLA ye una entidá acreditada pola Conseyería d’Educación, Cultura y Deporte pa la formación permanente del profesoráu en llingua asturiana.

Les persones interesaes en participar nesta iniciativa del coleutivu cívicu pueden atopar más información o formalizar la matrícula nos teléfonos 985.22.95.53 y 679.65.09.98, o al traviés del corréu electrónicu uvieu@exunta.org.