Suzuki anuncia’l zarru de la so planta asturiana pal últimu día de marzu

La crisis nun da tregua n’Asturies. La multinacional xaponesa Suzuki comunicó al Gobiernu'l pieslle de la planta de Xixón, la única que mantenía activa n’Europa. Esta decisión afeuta a 170 trabayadores de la compañía y a la industria auxiliar.

El conseyeru d'Economía y Emplegu, Graciano Torre, dio l’anuncia de la empresa automovilística –en Xixón namái se fabricaben motocicletes– esti martes en rueda prensa: el zarru va ser pal 31 de marzu próxima, una decisión que, afirmó, ye "irreversible". Nuna xunta celebrada esta mañana ente'l Javier Fernández y dellos representantes de la empresa Suzuki, el Gobiernu intentó negociar otres alternatives al "zarru", aseguró'l conseyeru, que consideró de "nefasta" la noticia del pieslle de la planta de Xixón. Suzuki achaca'l zarru "a les perdes económiques de la empresa", que foron de 30 millones d'euros nos cuatro años últimos, según los representantes de la compañía.

Torre aseguró que la decisión del pieslle "tomóse en Xapón, nes altes instancies de la compañía", y nun cree que "dependa del responsable de Suzuki n'España". La compañía xaponesa argumentó, según comentó’l conseyeru, "la imposibilidá de producir n'Europa", pa depués repetir que l’Executivu intentó "buscar "otres soluciones", pero la decisión yá taba "tomada". D'equí p'alantre "van empezar a negociar colos trabayadores el zarru ordenáu de la planta", sentenció’l responsable d’Economía y Emplegu.

Pese  a que son 200 les persones que s'alcuentren trabayando nesti momentu na planta de Suzuki en Porceyo, "ye posible que caltengan la parte comercial de la venta de motos", polo que l'ERE previstu podría afeutar a lo último a un total de 170 emplegaos. La totalidá de la plantiya de la empresa, al conocer la noticia, decidió parar como forma de protesta. Mentes, los sindicatos esixeron al Gobiernu “un puñetazu na mesa”.