Compromisu llama a participar “de forma masiva” na fuelga xeneral tres conocer los datos del paru

Los datos daos a conocer el llunes sobre’l paru n’Asturies llevaron a Compromisu a criticar el papel que tán xugando les fuercies parllamentaries. La federación llama a participar “de forma masiva” na fuelga xeneral del 14 de payares.

Yolanda Huergo, vocera nacional de Compromisu por Asturies, considera que les cifres sobre’l desemplegu son un “reflexu d’una clase política que nun se dio cuenta de que la crisis, los sos culpables y les sos consecuencies tienen carauterístiques específiques n’Asturies, colo que necesita actuaciones especialmente diseñaes pa sacar a Asturies del pozu”. Por esti motivu, cree que los asturianos y asturianes han de principiar a esixir “respuestes de les instituciones autonómiques énte unos datos del desemplegu que se xustifiquen difícilmente pola crisis española y mundial, yá que tamos falando de qu’Asturies ye onde más aumentó, doblando la media estatal”.

Compromisu critica que, pese a los datos del paru, les fuercies parllamentaries nun tomen midíes: “El tripartitu de PSOE-IX y UPyD continúa aplicando les recetes de Rajoy y la Troika, col aplausu de Foro y PP, lo que nos condena a la ruina económica y social”. Poro, llama a la ciudadanía a participar “de forma masiva” na convocatoria de fuelga xeneral del 14 de payares pa reclamar “una transición democrática verdadera onde los nuesos derechos y llibertaes nun tean suxetos a los intereses coyunturales del PP y el PSOE, y que la economía sía un instrumentu p’ameyorar la calidá de vida de los ciudadanos y non una escusa pa recortar derechos y prestaciones”.