El Centru Sociocultural de Les Vegues acueye’l seminariu ‘Llingua y sociedá asturiana’

El Serviciu de Normalización Llingüística de Corvera entama’l seminariu ‘Llingua y sociedá asturiana’. Ésti va celebrase dende esti llunes hasta’l 19 d'avientu nel Centru Sociocultural de Les Vegues.

L’oxetivu d’esti seminariu ye introducir a los participantes “na historia y socioloxía de la llingua asturiana y les sos falantes, centrándose en cuestiones históriques, sociolóxiques y socioculturales del idioma, mirando pa temes como la identidá, el poder social, los prexuicios, los derechos llingüísticos, los nuevos espacios d'usu de la llingua, la última lliteratura asturiana, etc.”. Asina, van desendolcase los conteníos siguientes: ‘Formación histórica de la llingua asturiana’; ‘Espaciu simbólicu, material y territorial: trés variables’; ‘Aproximación sociolóxica a la población asturianofalante: idioma y poder social’; ‘Toponimia: orixe y importancia’; ‘Ciencia n’asturianu: l’ámbitu desconocíu’; ‘La llingua na rede: recursos, diversidá y posibilidaes’; y ‘Lliteratura escrita y oral: una puesta al día’.

Toles persones qu’acudan a les cinco xornaes del seminariu, d’inscripción gratuita, van recibir un diploma acreditativu d’asistencia. El Centru Sociocultural de Les Vegues, na plaza de la Llibertá, foi’l llugar escoyíu pol Serviciu de Normalización Llingüística de Corvera pa desendolcar esta primer edición de ‘Llingua y sociedá asturiana’. Les clases van tener llugar los llunes y miércoles de 18 a 20 hores dende güei hasta'l 19 d'avientu.