Refugada una moción pa encamentar al Gobiernu asturianu a que cumpla la Llei del Salariu Social

El Plenu de la Xunta Xeneral del Principáu refugó güei colos votos a la escontra del PSOE y d'IU-BA-Verdes encamentar al conseyu de Gobiernu a presentar darréu nel Parlamentu'l Plan Autonómicu d'Inclusión social, asina como a cumplir los plazos previstos na Llei de Salariu Social Básicu acabando colos retrasos de les tramitaciones d'espedientes.

   La diputada del PP, Inmaculada González, recordó que la conseyera de Bienestar Social reconoció la pasada selmana qu'existen delles solicitudes del Salariu Social paralizaes y los retrasos y incumplimientos de plazos del Plan Autonómicu d'Inclusión Social, y afirmó que la moción que presenten nun diba ser necesaria de cumplise lo establecío na Llei del Salariu Social Básicu.

   Acusó a la conseyera de mentir cuando prometió que'l Plan d'Inclusión diba unviase darréu al Conseyu Social porque "a día de güei nun entró". González destacó les permales consecuencies de los retrasos na tramitación del Salariu Social pa los que más lu necesiten y consideró "impresentable" que l'Executivu incumpla la llei.

   "Si ustedes nun voten güei esa moción, va suponer que tán incumpliendo la Llei", dixo Inmaculada González.

   La diputada d'IU-BA-Verdes, Diana Camafeita, manifestó que la vocera del PP nun pue acusar a IU nin a la conseyera d'incumplir la Llei del Salariu Social y recordó qu'Asturies ye de les poques comunidaes que cuenta con ella. Poro, pidió a la diputada del PP que nun xenere alarma social, dao que conoz el gran alderique celebráu la pasada llexislatura p'aprobar dicha llei.

   "Nun vamos apoyar la moción pol so mesmu argumentu, ye dicir, porque lo que recueye la moción ye lo que manda la llei y poro va cumplise", dixo Camafeita, que manifestó que la pasada selmana la conseyera ofreció tolos plazos y los datos concretos sobre la resolución de los espedientes, que se van cumplir.