El NH de Xixón acueye’l II Salón Internacional de les Sidres de Gala

El restaurante Avant Garde, del Hotel NH de Xixón, ye’l llugar escoyíu pa la celebración del II Salón Internacional de les Sidres de Gala. Esti certame, que s’amplia a dos díes, tien como oxetivu la promoción d’estes bébores non escanciables.

La revista La Sidra y la Fundación Asturies XXI entamen el salón internacional, “una oportunidá única pa prebar sidres de tol mundu que nun son d'escanciar: axampanaes, esplumoses, brut, de nueva espresión, aguardiente, de xelu...”, espliquen. Güei, primer xornada del eventu, va tener llugar la cena de gala, ellaborada pol cocineru asturianu estrella Michelín Javier Loya, na que tolos platos van tar maridaos con dos sidres estremaes. Dellos espertos van esplicar a los comensales les carauterístiques de les bébores nesta cena, con places restrinxíes, que tien un preciu de 50 euros.

La novedá principal d’esti añu va ser la tastia abierta de mañana, n’horariu de 11 a 15 hores pa profesionales del seutor y de 17 a 21, pa públicu xeneral, na que los presentes van poder prebar toles sidres participantes nel salón. La rellación de participantes asturianos ye la siguiente: Sidru’s y Sidra Dulce Bernueces (Bernueces); Zapica (Buznego); La Real (Champanera de Villaviciosa); Villacubera (Cortina); El Gaitero Etiqueta Negra y Sidra Natural El Gaitero (El Gaitero), Millenium (Escanciador); M. Norniella (Huerces); Aguardiente de sidra Los Serranos y Crema astur Los Serranos (Los Serranos); Sidra Mayador producción limitada, Valdediós DOP, Mayador 33 cl, Mayador 33 cl. Rosada, Mayado 33 cl. 0,5 por cientu (Mayador); Sidra de Xelu Panizales (Panizales); Aguardiente Viejo de Sidra Salvador del Obispo y Tareco (San Juan del Obispo). Tamién habrá la oportunidá de disfrutar de delles sidres estranxeres y de tasties guiaes a cargu de Manuel Busto y Donato Xuaquín Villoria. El preciu d’entrada va ser de 5 euros.