Benayas: “Nun hai conflictu políticu nengún con Compromisu”

Manuel Benayas, voceru nacional del Bloque por Asturies, asegura que “nun hai conflictu políticu nengún con Compromisu”. Diz desconocer la esistencia d’un seutor críticu dientro de la fomación “que se consolide como tal”.

El de Samartín del Rei Aurelio quixo asina responder a les declaraciones feches por Pablo Fernández, voceru del Bloque en Gozón, a Asturies.com nes qu’afirmaba que “parte de la militancia del Bloque ta dececpcionada col proyeutu de Compromisu”. “Pablo ta nel so derechu a dicir lo que-y paeza”, apunta Benayas, que nun oculta la sorpresa de la formación nacionalista pola decisión del gozoniegu d’utilizar un mediu de comunicación p’amosar esti descontentu y non la xunta nacional, que s’aconceyaba ayeri. “La organización sigue, como siempre, funcionando democráticamente y tien les puertes abiertes a tol mundu, militantes y simpatizantes, pa qu’espresen y propongan lo que quieran”, asegura.

“Compromisu nació hai cuatro meses con una direición nueva formada por xente de Bloque y UNA, y independientes, que debería de rodar”, esplica Benayas, que recuerda que na constitución de la federación de partíos “aprobóse una ponencia política básica que, cola participación de toos, tien que desendolcase”. El voceru del Bloque, y tamién de Compromisu por Asturies del Nalón, nun escuende que “pue haber coses que solucionar” no que se refier al discursu políticu, pero entiende que ye dalgo qu'hai que dir filando. “Trátase d’una situación normal en cualquier organización de creación nueva con xente que tien unos métodos de trabayu diferentes”, añade.

Sobre la crítica de Fernández pola presencia de Yolanda Huergo, vocera d’Unidá Nacionalista Asturiana (UNA), na Executiva Nacional de Compromisu, Benayas diz nun entendela “yá que Yolanda ta ehí a títulu personal, como’l restu de persones de la direición”, y apunta que la so candidatura “salió escoyida por votación secreta con un solu votu en contra”.