CC OO confirma que’l 14 de payares va haber fuelga xeneral

Fernando Lezcano, secretariu de Comunicación de CC OO, confirmó esti vienres que’l miércoles 14 de payares va haber fuelga xeneral en tol Estáu. Esti paru va coincidir col convocáu en Portugal dientro d’una xornada europea de protestes.

En declaraciones a los medios mientres la xunta del Conseyu Confederal del Comisiones Obreres (CC OO), Lezcano confió en que l'apoyu a la fuelga va ser "masivu" y dixo que los sindicatos tán cargaos de razones pa convocar el paru. Amás, confió que la que va ser la segunda fuelga xeneral nel mesmu añu –l’anterior tuvo llugar el 29 de marzu– suponga un "cambiu significativu" nel xuegu de poderes na Xunión Europea (XE), y resaltó'l saltu cualitativu "espectacular" que supón la fuelga xeneral al empar en Portugal y nel Estáu español a nivel de coordinación sindical nel ámbitu européu.

El 14 de payares tamién podría ser xornada de fuelga xeneral en Grecia, Italia, Malta y Xipre, territorios onde los ciudadanos tán viéndose afeutaos enforma polos recortes gubernamentales. Nel restu de países europeos, los sindicaos prevén una xornada d’aición contra les politiques d’austeridá.