FSA-PSOE, Foro y PP aprueben una propuesta d’UPyD contra les consultes d’autodeterminación

La Xunta Xeneral mostróse esti xueves contraria a consultes democrátiques d’autodeterminación como la que se plantega en Catalunya. Namái Izquierda Xunida votó en contra de la propuesta d’Unión Progreso y Democracia (UPyD).

El partíu de Rosa Díez, FSA-PSOE, Foro de Ciudadanos y PP manifestaron la so oposición a les "tentatives de secesión" y "a la convocatoria illegal de consultes d'autodeterminación como la qu'apocayá foi plantegada dende'l Gobiernu y el Parllamentu de Cataluña". Ésta foi una de les 105 propuestes presentaes na tercer xornada del Debate d’Orientación Política polos cinco grupos parllamentarios de la Xunta Xeneral.

La iniciativa contraria a procesos como'l que se ta dando en Catalunya foi defendida pol diputáu asturianu d’UPyD Ignacio Prendes, que recordó na so propuesta que la "xunidá de la nación" ta consagrada nel artículu 2 de la Constitución Española y que ye más qu'un principiu xurídicu o una formulación astracta, yá que constitúi "el meyor preséu pa garantizar la cohesión y l'igualdá ente tolos ciudadanos españoles". Nesti sen, la propuesta de resolución pide al Gobiernu del país qu'encamiente al Executivu estatal a que "esplegue tolos mecanismos llegales disponibles nel marcu de les sos competencies na defensa del orde constitucional vixente".

A la diputada de d'IX, Noemí Martín, la redaición paeció-y un escesu y señaló qu'esti tipu d'iniciatives, al igual que les pallabres del ministru d'Educación, Cultura y Deporte, José Ignacio Wert, "nun ayuden en nada" y namás valen pa "avivar el conflictu". Martín afirmó qu'ella nun sofita la independencia de Catalunya, pero convidó al restu de los diputaos a que pierdan el mieu a que la xente opine. "Esti debate ta diendo por caminos peligrosos", comentó.