El siguimientu de la segunda xornada de la fuelga médica baxó a un 5,97 por cientu, según el SESPA

Un 5,97 por cientu. Ésta ye la cifra na que’l SESPA situó’l siguimientu de la segunda xornada de fuelga médica n’Asturies. Por contra, el SIMPA calificó de “masivu” l’apoyu al paru de los 4.000 profesionales convocaos.

En nota de prensa, el Gobiernu concretó que güei la fuelga tuvo un siguimientu del 0,59 por cientu n’Atención Primaria y del 8,53 por cientu n’Atención Especializada. N’atención hospitalaria la mayor incidencia concentróse na área sanitaria VII, con cabecera en Mieres, con un siguimiento del 18,8 por cientu, y les menores nes árees sanitaries II y VI, con cabecera en Cangas del Narcea y Les Arriondes, de manera respeutiva, nes que nun hubo nengún profesiona en fuelga, según aseguren dende’l Serviciu de Salú del Principáu d’Asturies (SESPA).

Pela so parte, el Sindicato Médico Profesional de Asturias (SIMPA) indicó que la segunda xornada de paru obligó a suspender "cientos d’intervenciones, consultes y pruebes diagnóstiques". Asina, dende’l sindicatu inciden en que los datos confirmen, "en contra de lo que caltién l’Alministración", el siguimientu masivu de la fuelga" al tener en cuenta unos servicios mínimos “abusivos”. El paru va continuar mañana, miércoles, ente les 8 y les 11.45 hores.