Compromisu por Asturies busca logotipu ente la so militancia mediante un concursu

Nel mes de xunu nacía la federación de partíos Compromisu por Asturies tres la celebración d’un conceyu fundacional n’Uviéu. La formación nueva, ensin logotipu, entama agora un concursu ente la so militancia pa escoyer un distintivu.

Tolos militantes de Compromisu pueden presentar toles propuestes que quieran siempre que sían de collecha propia. Sicasí, pueden pidir asesoramientu a espertos gráficos pa meyorar la idea. Según recen les bases del concursu, el logotipu ha d’incluyir la pallabra ‘Compromisu’ o una sigla, y adaptase a los conceyos y a la organización nacional: Compromisu ‘por Asturies’, ‘por Xixón’, ‘por Uviéu’, etc. Mentes, el formatu nel qu’ha d’unviase’l trabayu ha de ser .png, anque tamién valdría .jpg y .tiff.

El 21 d’ochobre ye’l día últimu pa presentar los logotipos al traviés del corréu contactu@compromisu.com. La Xunta Nacional va valorar “la claridá, la composición y el desendolcu gráficu de la propuesta; la facilidá y la economía de la so reproducción en soportes estremaos; y la capacidá de trasmitir sintéticamente’l nuesu proyeutu políticu”. El procesu d’escoyeta va facese mediante rondes eliminatories hasta la seleición de les trés finalistes, de les que saldrá’l logotipu de la federación de partíos. Hai que destacar que la persona ganadora del concursu podrá elexir si quier que’l so nome sía públicu o non.