El Turnebís del Tribilín va representar esti llunes en Xixón la lleenda del cuélebre de San Llorienzu

El grupu de teatru de solombres El Turnebís del Tribilín va representar el llunes en Xixón la lleenda del cuélebre de San Llorienzu. Ésta cuenta la historia d’un cuélebre que facía la vida imposible a los pescadores de Cimavilla.

El que fora direutor y verdaderu impulsor del Muséu del Pueblu d’Asturies, Luis Argüelles, recopiló de la tradición oral esta llenda qu’El Turnebís del Tribilín va representar como homenaxe al llabor d’investigación  y espardimientu del folclor asturianu del etnógrafu. Al mesmu tiempu, Manuel Santiago López, responsable del grupu de teatru, busca “recuperar una historia tradicional de cuélebres qu’asocedió en Xixón, o asina lo cuntaben, nun hai tantu tiempu, lo que valdrá pa que siga viva ente nós otra tiradina más”. Ésta fala d’un cuélebre que tenía amargaos a los pescadores de Cimavilla al rompe-yos de siguío les redes y otros apareyos de pesca, y de cómo consiguieron engañalu col sofitu d’un ermitañu pa facelu desapaecer.

L'espectáculu, previstu pal llunes na sede nueva del Club de La Nueva España de Xixón, na plaza del Monte Piedá, a partir de les 19.30 hores, va tener l’habitual acompañamientu musical del Dani García de la Cuesta. Mentes, Luis Miguel Piñera va ser l’encargáu de presentar l’actu, nel que tamién va intervenir l’investigador etnográficu y dibuxante Berto Álvarez Peña. El Turnebís del Tribilín, nacíu en Xixón nel 1985 de la mano de Manuel Santiago López, componen d’aquella de Quiquilimón, ye ún de los pocos grupos de teatru de solombres de tola Península Ibérica. Los espectáculos d’esta compañía que cultiva esti xéneru de gran tradición en China, Turquía, Grecia o Exiptu, básense nos argumentos “de cuentos y romances recoyíos de la tradición oral, como’l que se presenta, o d’otros enartiaos con Asturies y la mar como ‘El Milagro del Cristu del Socorro’, de Lluanco; ‘El pleitu de les tolines’, de Candás; o otros como ‘El molín máxicu’, ‘El mozo arriero’, ‘El enamorado y la muerte’, ‘La esposa infiel’, etc.”.