Skontra actúa en Xixón xunto colos catalanes Drink Hunters

La Sala Buddha va acoyer esti vienres un conciertu de punk-folk con dos de les bandes más reconocíes del Estáu nesi estilu. Los asturianos Skontra van actuar xunto colo catalanes Drink Hunters, que tocan per primer vegada n’Asturies.

Esti conciertu (21 hores, 5 euros), al qu’hai que sumar otru mañana na población cántabra de Comillas, naz d’una collaboración ente les dos bandes que va traducise nuna visita posterior de los asturianos pa tocar en Catalunya xunto a los de Barcelona. Con cinco años de trayeutoria, Drink Hunters ye un grupu con influencies irlandeses que se mira nel espeyu de bandes como Flogging Molly y Dropkick Murphys. Un bon complementu pa los llocales, que nunca dexen indiferente a naide nos sos conciertos colos so cantares punk con gaita asturiana.

Na axenda de conciertos d’esta fin de selmana tamién destaca’l que va ufrir el Tríu Corzobeyos (folk asturianu) nel Centru Social Autoxestionáu La Semiente baxo’l nome de ‘Conciertu Caleyeru’, yá qu’esta folixa va tar dedicada a Cerveza Caleya que, amás de ser asturiana ta etiquetada na llingua del país. Asina, responsables d’esta cerveza van facer una presentación de la mesma nesti llocal de L’Entregu a partir de les 20 hores.