Los sindicatos sanitarios dexen el zarru tres 29 díes y anuncien que tamién van dir a la fuelga

Tres 29 díes de zarru, los sindicatos sanitarios decidieron abandonar de manera definitiva la sede del SESPA y entamar una fuelga’l 16 d’ochobre. “Nun mos queda más remediu”, dixo Francisco Menéndez, representante de SICEPA-USIPA.

Los delegaos sindicales de SICEPA-USIPA, SATSE, USAE, UXT y CC OO salieron de les instalaciones del Serviciu de Salú del Principáu d’Asturies (SESPA) a les 18 hores y anunciaron l’aniciu de los paros pal martes 16 d’ochobre.  Según apuntó Menéndez nun-yos quedaba “más remediu”. El representante del Sindicato de Celadores y Personal no Sanitario-Unión de Sindicatos Independientes del Principado de Asturias (SICEPA/USIPA) llamentó que na xunta de la mesa de función pública, l'Alministración nun se moviera “nada de los sos plantegamientos a pesar de que'l llunes comprometióse a presentanos una propuesta nueva".

Nesti sen, dixo que la manera de proceder del Gobierno ta demostrando que nun quieren dialogar, sinón "imponer" unes reformes qu'ataquen derechos de los profesionales de la sanidá asturiana. El dirixente sindical afirma que tán dispuestos a asumir una xornada mayor, tal como establez la llexislación estatal, pero nun ve de recibu que l’Executivu intente aprovechar esa llei pa introducir otres reformes que signifiquen "recortes de derechos". Esta fuelga va sumase a la que yá convocó'l sindicatu médicu profesional, SIMPA, tamién en desalcuerdu coles reformes que plantega’l Gobienu.