El Parlamentu Européu sofita los programes d’inmersión llingüística

El Parlamentu Européu aprobó una resolución ellaborada por eurodiputaos del PSC, CiU, ICV, PNV y EA na que se diz que ye "vital salvaguardar el multillingüismu en países o rexones donde coexisten dos o más llingües oficiales”. Esti testu elimina una enmienda a un informe sobre multillingüismu presentada pol PP na que defendía “que los pas escueyan la llingua d’escolarización de los sos fíos”.

El testu de los populares foi incluyíu nel “Informe sobre multillingüísmu” como enmienda al testu orixinal, ellaboráu por un diputáu portugués. La enmienda presentóla’l diputáu del PP Luis Herrero y foi aprobada pola mayoría conservadora na Comisión de Cultura en febreru.

Sicasí, si l’Informe yera ratificáu, anque nun yera vinculante, podría suponer la puesta en cuestión de los programes d’inmersión llingüística aplicaos nel sistema educativu catalán. Por esa razón los diputaos María Badia del Partit Socialista de Catalunya-PSOE, Raül Romeva d’Iniciativa per Catalunya, el de Convergència i Unió Ignasi Guardans, y los  vascos Mikel Irujo (EA) y Josu Ortuondo (PNV) presentaron un testu alternativu, frente al diputáu popular Alejo Vidal-Quadras, conocíu pola so oposición a los planes de normalización llingüística de les llingües non castellanes, que defendió la enmienda popular.

D’esti mou los grupos de los que formen parte esos diputaos (Partíu Socialista Européu, los Lliberales, los excomunistes, los Verdes y la Alianza Llibre Europea) aprobaron por 355 votos frente 279 un testu que suprime los párrafos más polémicos de la enmienda del Partido Popular, na que se conseñaba que “nengún escolar debe tar priváu de recibir so enseñanza nel idioma oficial del Estáu”.