Civit i Martí: “La marcha pola independencia abrió una puerta que nun va zarrase enxamás”

El 11 de setiembre más d’un millón y mediu de catalanes salieron a les cais de Barcelona pa reclamar la independencia del país. Ferran Civit i Martí (L'Espluga de Francolí, 1977) coordinó esta marcha de l’ANC xunto con Ignasi Termes.

En primer llugar, norabona pol ésitu de la marcha de la Diada Nacional de Catalunya.

Ye un ésitu compartíu col tol pueblu catalán, qu’amosó una madurez política y un saber facer impresionante.

¿Esperaben dende l’Assemblea Nacional Catalana (ANC) un poder de convocatoria tán grande?

Sabíamos que’l pueblu taba moviéndose; qu’había un movimiento de fondu bastante grande. Nun podíamos cuantificar nos díes previos lo que diba a asoceder, pero sí que veíamos que pasaría dalgo. Nós planificamos la marcha pola independencia siguiendo pautes establecíes por Martin Luther King y Mahatma Gandhi nos sos movimientos anteriores, polo que convocamos marches a escala pequeña per tol territoriu, lo que significaba más de 300 actos y miles de persones participando pese a ser branu. Foi sorprendente la xente que, en xunetu o agostu, feches vacacionales, tomó parte nelles.

Díbamos viendo que la cosa diba medrando y medrando… Entós fiximos una estratexa comunicativa nesti mes últimu que nos permitió enllenar, nós solos como Assemblea, casi 1.200 autocares, a los qu’hai que sumar los entamaos por partíos políticos y organizaciones de toda mena, incluyida Òmnium Cultural, entidá de referencia equí en Catalunya. Dada esta respuesta, la repercusión nos medios de comunicación y la implicación de los partíos políticos, convirtiendo la nuesa propuesta nel centru del debate políticu en Catalunya, vimos qu’esto podía tener una repercusión espectacular. Y lo que conseguimos foi que fora eficaz pese a los pocos recursos, algamando oxetivos claros: ún cuantitativu, con más d’un millón y medio de persones según la Guardia Urbana –si fixéramos un cómpotu per satélite quiciabes saldríen más–, pero tamién cualitativu, yá que tres el 11 de setiembre’l panorama políticu catalán dio un vuelcu. Abrióse una puerta que nun va zarrase enxamás.

La marcha tuvo muncha repercusión dientro l’Estáu, lo que s’esperaba, pero tamién fuera. ¿Sorprendió-y?

Dende l’Assemblea fiximos muncha cocina previa. Teníemos los medios que teníemos, pero con muncha intelixencia, un trabayu intensu, y aprovechando cualquier güecu pa colanos pa llegar a cualquier contautu, llegamos a tener tánta repercusión. Sicasí, lo de los medios internacionales nun nos sorprendió. Munchos yá taben atentos a lo que pasaba en Catalunya tres el procesu estatutuariu previu qu’acabó nun fiascu políticu tanto pa Catalunya como pa España, pero tamién al fechu de qu’hubo una gran manifestación el 10 de xunetu del 2010 onde la xente amosó’l so refugu a que se recortara l’Estatutu, un xestu de bona voluntá pa llegar a un entendimientu y que nun se quixo escuchar.

Los medios españoles, visto’l trabayu que fixeren siempre qu’hubo una propuesta dende Catalunya, nun los trabayamos. Lo qu’aprendimos de manera negativa foi qu’hubo silenciu primero, agresividá depués, y esto creo que ye una falta de cultura democrática que n’otros países nun esiste. N’Escocia ta produciéndose un procesu d’autodeterminación con una consulta, un referéndum, nel 2014 y Gran Bretaña y la clase comunicativa respondieron con un ‘nun mos presta, pero vamos combatilo con armes democrátiques’. Lo mesmo asocede en Canadá con Québec. En Catalunya vimos muncha agresividá nos medios de comunicación énte una propuesta democrática, pacífica y con voluntá d’entendimientu, porque, a fin de cuentes, nós nun somos ‘antinada’. Queremos mañana tener un Estáu y ser bonos vecinos colos españoles, la nuesos vecinos de rellanu.

El pueblu catalán yá movió ficha, ¿qu’ha de facer agora’l Govern?

Nós lo que queríamos con too esti procesu yera poner en bandexa a la clase política catalana que viera qu’hai una mayoría aplastante y que nun se quedara namás nes encuestes; que se pudiera comprobar de manera visual. Por eso fiximos una gran asamblea onde la xente votó a entrugues diferentes sobre la independencia de Catalunya llevantando la mano de manera afirmativa con una cartulina verde, como si fora una asamblea. Eso ye lo que queríamos que viera la clase política catalana. Y en menos de doce hores el Gobiernu catalán yá movió ficha.

La otra cosa que queríamos dicir ye les nueses instituciones tienen que escuchar lo que-y marca la sociedá catalana, nesti casu, siguir un camín hacia la llibertá per medios democráticos y pacíficos. Tamién qu’éstes sientan que tienen facer los deberes y qu’hai un pueblu que ta non detrás, al so llau, siempre que dean los pasos afayadizos.

¿Cree qu’Artur Mas utilizó la marcha de la Diada d’una forma partidista?

Los díes previos a la marcha, tres facer un trabayu de cocina comunicativa, conseguimos que se falara d’esti movimientu porque, a fin de cuentes, nós somos un movimientu mui mozu: formámonos de manera oficial nun actu nel Palau San Jordi’l 10 de marzu. Tuvimos preparando toda esta campaña dende la primavera, pero la xente nun nos conocía. Sí veía a centenares de grupos repartíos por dellos municipios de Catalunya que teníen munchu movimientu y qu’entamaben munches aiciones xunto cola Associació de Municipis per la Independència, otra iniciativa de nivel institucional nel que participen casi’l 60 por cientu de los municipios catalanes –tamos falando de 550 municipios–. Pero a fin de cuentes nun llegábamos; pa los grandes medios yera como si nun esistieramos.

A finales d’agostu, la bola de nieve taba faciéndose mui grande. El presidente Mas fixo una propuesta a raíz de la reunión con Rajoy en setiembre pa que’l 11 de setiembre fora un clamor pol pautu fiscal y a partir d’equí, la bola creció munchu más al traviés de los medios de comunicación y les redes sociales. Dada la situación, tol mundu tenía nidio qu’esta concentración xunitaria, esta marcha hacia’l Parllamentu pa reclamar a los políticos qu’anicien el procesu, yera nidia y inequívocamente pola independencia; pa nada pal pautu fiscal nin otres propuestes qu’anguaño son más utópiques que la independencia.  

¿Qué ye l'Assemblea Nacional Catalana?

Somos un coleutivu apartadista total con un oxetivu políticu únicu: conseguir la independencia de Catalunya por medios pacíficos y democráticos, y mediante ferramientes polítiques. L’Assemblea ta formada por xente que nunca nun participó en nengún movimientu, otros que sí formaron o formen parte de movimientos de tipu cultural o independentista, y por xente de partíos políticos baxo la condición sine qua non de que si quieren tar dientro nun pueden tener nengún cargu. Na asamblea constituyente aprobamos por unanimidá que somos una organización que va desapaecer cuando consigamos l’oxetivu de la independencia y que nun nos constituiríamos en nengún proyeutu políticu.

¿Cuánta xente conforma’l coleutivu?

Tamos llegando a los 10.000 socios tres una xuba espectacular tres la marcha, a los qu’hai que sumar 5.000 simpatizantes.

L’ANC fundóse en marzu d’esti añu, pero tien el xerme nes consultes populares aniciaes nel 2009.

La historia d’esti movimientu ye llarga. Dende Catalunya llevamos más de 150 años xenerando una rede asociativa mui potente que nun tien nada qu’envidiar a los países con unos índices elevaos de participación ciudadana: hai municipios de 2.000 habitantes que tienen hasta 40 asociaciones. Esto permitió que, a mediaos del sieglu XIX, cuando entama la recuperación de la identidá catalana depués d’un sieglu d’ocupación castellana, hubiera un movimientu asociativu, deportivu, escursionista, cultural, etc., que foi un caldu de cultivu pa qu’hubiera, cola entrada del sieglu XX, una masa civil mui activa, más allá de los partíos políticos.

Nós somos herederos claros de l’Assemblea de Catalunya, que foi un movimientu asociativu y cívicu qu’anició’l procesu de la transición democrática en Catalunya nos años 60 y que foi pionera nel Estáu español. Depués, tamién somos herederos de la Crida per la Solidaritat i la Llibertat, un movimientu de base non violenta que pretendía defender la independencia de Cataluya y que fixo dalgunes aiciones de desobediencia civil con muncha ironía y una carga política alta. Depués llegó’l procesu estatutuariu, que movilizó a muncha xente, y llueu l’aniciu de les consultes populares, la primer d’elles el 13 de setiembre del 2009 n’Arenys de Munt. Éstes crecieron per tol país d’una manera espectacular gracies a esi movimientu asociativu de base, siendo cientos los llugares que celebraron esti tipu de consulta. Los núcleos que se crearon a partir d’esti procesu permitieron articular lo que depués foi la Assemblea Nacional Catalana: un movimientu de base con implantación en toda Catalunya.

¿El camín a siguir ye’l que ta tomando Escocia?

Catalunya tendió la mano a España, qu’en nengún momentu quier asumir que somos un estáu plurinacional, al contrario de lo que fixo Canadá o Bélxica, y por eso emprende’l vuelu. España ye vecín de rellanu de Catalunya con Galicia, Euskal Herria, Asturies y cualquier otra nación que se considere, pero hai sieglos qu’entra na nuesa casa, quedó con una copia de les llaves, vacía la nevera, insúltanos, maltrátanos… Por eso decidimos que quede fuera y que nos atopemos namái nes reuniones de la comunidad de vecinos.

Nesi casu concretu que comenta, queda nidio que Gran Bretaña tien una tradición democrática mui llarga, al contrario del Estáu español, y d’ehí’l referéndum. Nós lo qu’emprendemos ye un camín democráticu nidiu, tresparente; España nun sabemos hacia ónde dirá. Asina como Gran Bretaña, Canadá y Bélxica responden con madurez pese a que nun-yos gusta lo que ta pasando, n’España nun salen con respuestes democrátiques, sinón con dalgún militar qu’otru amenazando colos tanques.

¿Cuáles van ser los movimientos próximos de l’ANC?

Agora los escenarios tán abiertos. La clase política recoyó’l guante de la voluntá popular y nós taremos al llau de la clase política que dea pasos firmes hacia la llibertá del país. De momento tamos a la espeutativa, con tola maquinaria preparada. Pue asoceder cualquier cosa, dende qu’haya eleiciones anticipaes a un referéndum pola independencia, hasta que s’entame una ofensiva española que lleve a la supresión de l’autonomía de Catalunya. Nós tenemos nidio qu’agora, más que nunca, el pueblu catalán y les instituciones tienen que dir a la par, porque’l país somos toos.