Iniciativa pol Asturianu incorpórase a una ONG europea de defensa de les llingües minorizaes del continente

Col envís de llevar el conflictu llingüísticu asturianu a Europa, Iniciativa pol Asturianu ta acabante d’incorporase a ELEN (European Lesser-Used Languages). Esta ONG trabaya na promoción y proteición de les llingües europees minorizaes.

Según espliquen dende esti coleutivu, ELEN “tien una trayeutoria sólida y esitosa nel exerciciu de la presión en favor de les llingües minoritaries na Xunión Europea xunto con una estensa rede d'organizaciones del ámbitu llingüísticu dende los sos cimientos, y na actualidá actúa representando a los falantes de les llingües minoritaries de la XE col mandatu de los comités estatales y ONGs miembros de la yá desaniciada EBLUL (Oficina Europea de Llingües Minoritaries)”. Tamién funciona como un serviciu d'información sobre temes rellacionaos coles llingües minoritaries, la diversidá llingüística y les minoríes nacionales n'Europa, y ufre un serviciu d'información online al traviés d'Europa y pa tol mundu a ONGs, medios de comunicación, gobiernos –dende la XE al ámbitu llocal–, académicos, investigadores y públicu en xeneral.

“D'esta manera, Iniciativa pol Asturianu xúnese a un ambiciosu proyeutu col enfotu de faer que'l conflictu llingüísticu asturianu llegue a tolos niveles n'Europa y por que la voz de tolos falantes d'asturianu sía escuchada nel continente”, apunten dende la organización cívica.