L’Asturiana Mining Company continúa cola ‘Xira del Meyor Cantar’ con una actuación en Xixón

Tres el conciertu nos actos oficiales del Día d’Asturies, en Tinéu, l’Asturiana Mining Company va continuar cola so ‘Xira del Meyor Cantar’ con una actuación en Xixón. Va ser el vienres, en Pumarín-Xixón Sur, a partir de les 20 hores.

L’Asturiana Mining Company, grupu comandáu por Michael Lee Wolfe fundáu nel 1998, consiguió nel mes de febreru’l Premiu al Meyor Cantar del 2011 col tema ‘Si nun conoces Vaḷḷouta’, lo que-y da plaza pa concursar nel Liet International, concursu européu de la canción en llingües minorizaes qu’esti añu va celebrase’l 1 d’avientu na Llaboral de Xixón. Pa promocionar la llegada per primer vagada d’esti certame al país, l’Asturiana Mining Company, en collaboración cola Direición Xeneral de Política Llingüística, entama una xira per tol país na que la formación tamién presenta los temes del so discu ‘Sones por Berto Velasco’.

Les paraes siguientes de la ‘Xira del Meyor Cantar’ van ser Xedré (12 d’ochobre), La Felguera (20 d’ochobre), Avilés (3 de payares) y Uviéu (29 de payares). El conciertu del Centru Municipal Integráu Pumarín-Xixón Sur va tener entrada llibre.