Les organizaciones cíviques de defensa del idioma critiquen el recorte a les ayudes al asturianu

La Xunta pola Defensa de la Llingua Asturiana (XDLA) y Iniciativa pol Asturianu amosaron el so descontentu pol recorte del 61,53 por cientu a les ayudes al idioma. “Pue suponer el fin de la industria cultural n’asturianu”, afirma la XDLA.

“El sector cultural n’asturianu ye una industria grande que da trabayu a cientos de persones de manera direuta o indireuta y que, en tiempos de crisis, necesita de l'apoyu de l'Alministración”, afirmen dende la organización, que ve “llamentable y contradictorio que'l Gobiernu autonómicu anuncie planes pa crear emplegu por un montante de 10 millones d'euros y, per otru llau, apruebe recortes nun sector como'l de la industria cultural n'asturianu, que yá ta mui mermáu pola crisis y pal qu'esta mengua pue suponer la reducción de puestos de trabayu, sía por despidos o porque ciarren empreses”. Al mesmu tiempu, critica que l’Executivu siga apostando pol Centru Niemeyer “cuando tien una deuda acumulada de más d’un millón d’euros”, una cifra que ta lloñe “de les partíes destinaes a la promoción del sector editorial n’asturianu y gallego-asturianu”, poniendo “en peligru la viabilidá d’empreses qu’apuesten pol sector editorial na nuestra llingua”. Amás, recuerda la falta de visibilidá que tien el llibru n’asturianu nes llibreríes y, “dalgo que ye más sangrín”, nes mesmes biblioteques publiques.

La XDLA tampoco nun escaez que “el Gobiernu siempre premió a los medios en castellanu, otorgándo-yos les mayores partíes perriba de los que namás faen usu del asturianu, colo qu’esti recorte podría tar poniendo en peligru la esistencia de medios de comunicación nel nuestru idioma, un espaciu que güei ta llindáu namás al sector dixital”, faciendo alcordanza del casu de Les Noticies, periódicu en llingua asturiana que zarró la so edición impresa en febreru d’esti añu. Por último, la organización cívica apunta que “la promoción del idioma propiu ye dalgo obligáu pola llexislación asturiana –Estatutu d’Autonomía y Llei d’Usu–, polo qu’en tiempos de crisis estes partíes habríen de ser prioritaries”.

Pela so parte, Iniciativa pol Asturianu amosó nun comunicáu “la so refuga dafechu a esti xestu del Executivu asturianu y reclama un cambiu nesta midida darréu”. “Anque dende la nuestra asociación entendemos les perdifíciles circunstancies económiques peles que ta pasando'l Gobiernu asturianu, consideramos inxustificable un recorte qu'algame los dos tercios de la yá percurtia partida de 2011”, continúa la nota. Por último, esti coleutivu recuerda que l'Academia de la Llingua Asturiana sigue ensin recibir denguna aportación per parte l'Estáu español de la partida correspondiente a academies de les estremaes llingües del Estáu pola falta d’interés del Gobiernu de Javier Fernández.