La Coordinadora presenta un recursu d’alzada p’acceder al espediente sancionador pol arramáu d’Aboño

La negativa de Fomentu de permitir l’accesu a la Coordinadora Ecoloxista al espediente sancionador pol arramáu d’Aboño lleva a esti coleutivu a presentar un recursu d’alzada. Los ecoloxistes quieren evitar qu’esti socesu quede impune.

El 26 de xunu, un arramáu a la ría d’Aboño dende la central térmica d’HCEnergía, l’antigua Hidroeléctrica del Cantábrico, provocó la llegada de galipote a la mar, contaminando delles sableres de la zona. Nel so momentu, la Coordinadora Ecoloxista d’Asturies presentó una denuncia alministrativa y solicitó acceder al espediente sancionador, dalgo que refugó la conseyería. Dada la situación, la organización ta acabante de presentar un recursu d’alzada contra esta decisión. “Argumentamos qu’esiste un interés llexítimu que permite la personación nel referíu espediente sancionador abiertu, en virtú de denuncia interpuesta pola Coordinadora Ecoloxista, yá que la interposición d’una eventual sanción y una obligación de restaurar el dañu ambiental fechu con ocasión del arramáu de la central térmica o l’ausencia de tal sanción, pue producir un efeutu concretu que, como asociación que denunció los fechos, tenemos derechu a conocer”, señalen los ecoloxistes.

“Nun dexa de ser sorprendente l’actitú del Principáu, que nun quier que naide sepa de la tramitación del procedimientu sancionador a HC polos arramaos continuos na so térmica d’Aboño, que llevamos años denunciando”, aseguren dende la Coordinadora, que considera qu’esta postura “demuestra que se quier ocultar el desarrollu del espediente” pa que’l vertíu quede “impune”. La organización tampoco entiende que'l Gobiernu nun respuenda a los pidimientos d'información fecha a la Conseyería de Presidencia, Direición de Salú Pública y Conseyería de Fomentu, Ordenación del Territoriu y Mediu Ambiente, "organismos que foron responsables d'abrir al bañu les playes de Carreño ensin tener los resultaos analíticos d'hidrocarburos fechos". Tampoco ufren la copia del análisis posterior solicitáu hai más de 60 díes.