Si nun se ye rebelde, se ye cómpliz

Celebrar el Día d’Asturies nel contestu actual de crisis y recorte de derechos y llibertaes,  tien que servir pa reunir les voluntaes, opiniones, pa oponese a unes midíes inxustes y ineficaces, que namái xeneraron más desemplegu, más precariedá llaboral, más probeza y menos derechos; pa convocar a la reflexón y a la movilización contra unos mandatos que carguen sobre’l conxuntu de la sociedá los efeutos de la crisis económica a la vez qu’entreguen multimillonaries partíes a los mesmos sectores financieros que nos llevaron a ella y que, per otra parte, estrangúlannos pa que faigamos efeutivu’l pagu d’una deuda que la ciudadanía, nuna parte considerable, nun xeneró.

Asturies, con más de 100.000 persones en paru y d’elles 38.000 ensin nengún tipu de cobertura, con una mocedá na qu’ún de cada dos xóvenes ta en paru y los que trabayen faenlo nuna situación de salarios baxos y precariedá llaboral, les fuercies polítiques asturianes, de forma especial la izquierda, nun pue confiar al futuru una recuperación económica que s’espera pa llargu plazu. Hai que dar cobertura social pa evitar la esclusión d’estes persones. La defensa del caráuter públicu, gratuitu y universal de la sanidá y la educación, la xeneralización de la dependencia, la defensa del modelu acual de les pensiones, la cobertura y l’aplicación del salariu social y les polítiques de reactivación económica han de ser los exes prioritarios de la nuesa actuación.

La crisis y les polítiques impulsaes pol Gobiernu de Mariano Rajoy y el Partido Popular, amás de los efeutos sociales demoledores, cola voladura del pautu constitucional incluyía, llevaron a la sociedá, a la ciudadanía, a una situación qu’oscila ente’l mieu y la indignación. Mieu que paraliza y indignación qu’ha de tresformase na toma de conciencies; en solidaridá; en respuesta social; y en movilización constante y continuada contra estes polítiques que ponen a les persones al serviciu de la economía y non la economía al serviciu de la sociedá.

La reforma de la Constitución propiciada pol Gobiernu del PSOE, el de Rodríguez Zapatero, que contó col sofitu del Partido Popular pa fixar la llenda del techu de gastu –del nuesu endeudamientu na Constitución–, foi la cuerda cola qu'agora tán aforcándonos. Les soluciones que se dan a la crisis nun tienen base económica, sinón ideolóxica: nun faen lo que-y convién a la mayoría, sinón lo que-y interesa a esos poderes financieros que, en connivencia cola derecha política y les polítiques de derecha, quieren finar con too nun asaltu definitivu al poder. A los poderes económicos, que faen lo que quieren, estórba-yos la democracia. Too se merca y se vende; inclusive tán poniendo preciu al nuesu bienestar y les nueses vides.

La crisis como escusa, aprovéchase pa too: pa reducir l’Estáu y la democracia; p’acabar con conquistes sociales de décades; pa someter a les rexones a los dictaos de les decisiones de les multinacionales; pa incrementar el poder del mercáu frente a la democracia. N’Asturies yá lo tamos viendo. Vivimos peor y los nuesos sectores estratexicos tán amenaciaos. Asturies necesita d’un gobiernu y unes fuercies polítiques rebeldes frente a les midíes del Gobiernu central. Si nun se ye rebelde, se ye cómpliz.

La minería, con amenaza de piesllu; el campu, que ve incrementaos los sos costes que faen peligrar la viabilidá d’esplotaciones; el sector industrial, qu’al marxe de los costes derivaos de tarifa llétrica, tresfórmase en campu ‘esperimental’ pa l’aplicación de los xantaxes a los trabayadores derivaos de la reforma llaboral y la nuesa comunidá poles amences de desllocalización… Nesti escuru panorama, frente a los que pretenden caltener los nubarrones pa cegar la esperanza, namái cabe la confrontación y l’aplicación d’un modelu alternativu, distintu, nel que la crisis y los sos efeutos recaigan sobre los que la xeneraron: los que más tienen y pueden.

Asturies ha de preparase pa la movilización pola defensa del nuesu ser. Será pola defensa de los sos sectores económicos tradicionales y emerxentes, pola recuperación del estáu del bienestar, d’una forma d’entender la democracia, los derechos, les llibertaes y les conquistes sociales. A la defensa d’esti modelu, pola solidaridá y la xusticia, contra la esclusión y la derrota, convocamos a celebrar el Día d’Asturies, a recuperar les nueses señas de identidad, a tolos sectores sociales afectaos pola crisis y a los que dende la razón y el compromisu entienden que xuntos podemos conseguir frenar estes agresiones y construyir un modelu alternativu pa la salida de la crisis. Un llamamientu a la rebelión democrática.

Manuel González Orviz ye'l coordinador xeneral d'Izquierda Xunida (IX)