2012, L’estáu de la patria

Evidentemente la prioridá nestos momentos de los asturianos ye la situación económica: la situación económica xeneral, tanto no que respecta a la financiación esterior como a les cuentes del estáu; la falta d’actividá económica. La situación económica particular, de caún de los paraos, de caúna de les persones que tienen el trabayu inseguru o que vieren empeorar les sos condiciones nel empléu.

Pero ello nun quita pa qu’otres cuestiones, les político-xurídiques, les que cinquen a la nuestra condición política como nación, nun son menos importantes y l’abordales nun emparamenta un migayu la resolución de les económiques. Porque los asturianos tenemos por resolver la nuestra reforma estatutaria, la que yá ficieren Valencia, Cataluña, Aragón, Andalucía y otros. ¿Y nós, por qué non?

Si miren vustedes p’atrás y revisen les hemeroteques, hasta’l 2008 tolos partíos decíen que yera una cosa perurxente la reforma del estatutu asturianu. Llevaben dando la lata los del PSOE con ello, don Vicente Alberto, don Jesús Ordóñes y el restu la executiva y los diputaos socialistes. Cafiaben con ello los del PP, con Ovidio Sánchez al frente. ¡Y ,los de IU? ¡Esos glayaben al alto la lleva? ¿Y agora? Como si los llevara a toos el Sumiciu. Nin vierbu. Como afogaos. Y, estos, además, nin reforma estatutaria nin cooficialidá, nin nada de nada. ¿Alcuérdense vustedes? ¿Alcuérdense los que los votaren pol so calter asturianista? Pues nada, que-yos vaiga bonito (o «monu», polo menos).

¿Toos sopelexaben la necesidá la reforma estatutaria? ¿Toos decíen que nos afalaba la so necesidá? Toos non. Toos menos Javier Fernández. A esti bastába-y con correr a firmar nel 2003 l’apoyu a la reforma del estatutu catalán y al so «federalismu asimétricu», a votar dempués la reforma, a aplaudila dempués.

¿Y los demás? ¿Sintieren vustedes inxamás a Foro, esi grupu de sedicentes asturianistes, falar una vegada, una sola vegada, de la reforma estatutaria asturiana, d’esa ufiensa permanente a la nuestra condición de ciudadanos del estáu? Y d’UPyD , ¿qué vamos decir? Un partíu que se presenta a una autonomía col propósito de cerrar les autonomíes, ¿cómo va decir un res del aumentu de competencies y de la igualdá ente autonomíes? Lo qu’entovía ta por entender ye qué faen nun parlamentu que tien una faza de la soberanía del conxuntu l’estáu.

En fin, eses son les nuestres xeres, como asturianos y como asturianistes pal presente y pal futuru. Resolver los problemes económicos, sí, pero tamién recuperar  la nuestra dignidá política y la nuestra capacidá p’actuar per nós.

Ello ensin olvidar que tamos delantre d’un furacán na opinión pública que quier esaniciar les autonomíes y l’autogobiernu. Un furacán centaliegu, y mui cercanu a la mentalidá nada democrática d’otros tiempos. Mentalidá y furacán, por cierto, que nun s’alluga nes ñubes o ente les madexes d’oru de les xanes, sinón nes tiestes de munchos ciudadanos. ¡Tantos d’ellos votantes d’esos partíos.

 
                Xuan Xosé Sánchez Vicente ye presidente del Partíu Asturianista (PAS)