Los sindicatos sanitarios acusen al Sespa de nun presentar propuestes

El Sespa y los sindicatos sanitarios aconceyaron esti xueves, ensin avances. Los representantes de CC OO, UXT, SATSE, Usae y Sicepa/Usipa acusen a la xerencia del serviciu de salú del país de nun presentar propuestes.

Alejandro González, responsable de Comisiones Obreres (CC OO), reclamó que "na reunión próxima presenten dalguna propuesta porque, llamar por llamar, nun ye agradable pa naide" en declaraciones feches al traviés de las rexes de la puerta del Serviciu de Salú del Principáu d’Asturies (Sespa), onde los sindicatos sanitarios mantienen un zarru dende’l miércoles de la selmana pasada. Según denuncien, nun se-yos permite abrir la puerta.

Los responsables sindicales insistieron en que son conscientes de qu’hai que arimar el llombu nesta situación de crisis económica, pero consideren que les aiciones por parte del Gobiernu estatal y d’Asturies van nel sen contrariu a iguar la situación y creen más desemplegu. "Esta mañana –por ayeri–, mentes una reunión cola xerencia del Sespa, per un momentu casi se ruempen de manera definitiva les negociaciones, pero siguimos abiertos al diálogu p’amosar al Gobiernu d’Asturies que nós tenemos interés pa qu’esto se resuelva d’una forma satisfactoria", señaló el responsable de Sicepa/Usipa, Francisco Menéndez.

Pa finar, toos destacaron la xunidá sindical esistente ente les personas zarraes. "Yá somos un solu pensamientu y una sola voz, y vamos siguir lluchando hasta’l final pa conservar los emplegos", añadió la secretaría del Sindicato de Enfermería (SATSE), Margot Marqués.