Arcelor-Mittal amenaza con nun arrancar el fornu altu que ta reparando n’Asturies

La direición d’Arcelor-Mittal España aconceyó esti miércoles en Madrid colos sindicatos. La empresa plantegó una mengua del 25 por cientu nos costes salariales y amenazó con nun arrancar el fornu en reparación en Xixón si nun hai alcuerdu.

La propuesta fíxose nel marcu d’una reunión de la Comisión de Siguimientu del Alcuerdu Marcu 2009-2012, según confirmó’l responsable de MCA-UXT na seición sindical d’Arcelor-Mittal, Alberto Villalta, presente na reunión. Los trabayadores, que nun s’esperaben un anunciu d’eses carauterístiques por parte de la empresa, nun respondieron y tán analizandolu pa, el llunes próximu, día nel que tán convocaes otra vuelta les partes, comunicar la so postura.

"Baxo’l paragües de la reforma llaboral nueva, les empreses atrévense con too", llamentó Villalta. La direición de la firma anglo-india nel Estáu llegó inclusive a les "amenaces" si nun se llega a un alcuerdu, confirmó’l responsable sindical. Nesi sen, la compañía apuntó la posibilidá de nun arrancar el fornu altu que ta reparando na planta de Xixón, de descolgase del conveniu actual y d’imponer, a partir del añu qu’entra, unes condiciones mui diferentes y peores pa los trabayadores. Esa mengua del 25 por cientu de los costes llaborales afectará a tolos emplegaos del Grupo Arcelor-Mittal nel Estáu, esto ye, ente 10.000 y 11.000 persones.

Mentes, un voceru de la compañía llendóse a señalar que na reunión informóse a los trabayadores sobre la situación económica de la empresa nel Estáu y de les "midíes de contención de costes" que van ponese en marcha. Esplicó que la direición treslladó datos sobre la situación del mercáu internacional del aceru y, más en concreto, sobre la baxada de la demanda nel sur de Europa. Nel casu del Estáu esta situación agravóse pol colapsu del sector de la construcción, asina como pola cayida del consumu priváu, indiquen dende la firma anglo-india.

Reaiciones n'Asturies

La propuesta de la multinacional yá propició les primeres reaiciones de representantes sindicales n’Asturies. Nuna rueda de prensa n’Uviéu, el secretariu xeneral d’UXT, Justo Rodríguez Braga, dixo que los alcuerdos que se firmen tienen que cumplise y que por eso espera que la compañía lleve alantre tolo a lo que se comprometió. Mentes, el secretariu xeneral de CC OO, Antonio Pino, calificó de “xantaxe” el plantegamientu de la empresa hacia los trabayadores y recordó que se trata d’una multinacional que recibe recursos públicos. Amás, cree que pretende aprovechase de les condiciones "ventayose p’Arcerlor-Mittal y inxustes" hacia los emplegaos que concede’l Gobiernu de Mariano Rajoy y espera que nun se consienta esti "abusu".