Los sindicatos sanitarios alverten de que la fuelga “ta cada día más cerca”

Los representantes de los sindicatos que mantienen el zarru na sede del Sespa afirmaron que la fuelga “ta cada día más cerca”. Acusaron al conseyeru de Sanidá, Faustino Blanco, de “tracamundiar” y “de rise de los trabayadores”.

El responsable del sindicatu Sicepa/Usipa, Francisco Menéndez, señaló que la principal torga qu'esiste ente'l Gobiernu y los trabayadores ye'l coeficiente bonificador de ponderación de la vez rotatoria, "nin más, nin menos". "Nun pidimos una meyora retributiva y somos conscientes de qu'hai que trabayar más hores. Namás intentamos evitar el despidu de casi mil emplegaos". Menéndez acusó al conseyeru de "desconocer la realidá sanitaria asturiana" y aseguró que "nun ta preparáu pal cuidáu que dirixe". "La situación llévanos, mui al nuesu pesar, a una fuelga", añade

Nesti sen manifestóse tamién el responsable de CC OO, Alejandro González, que pidió al conseyeru que "sía valiente" y que diga a la opinión pública cuántes persones van quedar na cai cola midida aprobada'l 29 d'agostu nel Conseyu de Gobiernu. Acusó al Gobiernu de "dar una vuelta de tuerca más" al yá "dañible" decretu del Executivu estatal y recordó que'l personal rotatoriu trabaya 60 hores más que'l personal d'otres comunidaes autónomes. Amás destacó que los eventuales que van a dir pa casa son trabayadores estructurales, dao que lleven más de cinco año nos sos puestos. Estes afirmaciones apoyáronles tamién los representantes d'UXT, Satse y Usae, que dexaron nidio que "tienen fuerza pa siguir col zarru” –que mantienen dende la mañana del miércoles– y alvirtieron al conseyeru de que “la pelota ta nel so teyáu".

Protestes na cai

Unes quinientes persones protagonizaron una protesta esta tarde énte la sede del Serviciu de Salú del Principáu d’Asturies (Sespa) en defensa de la sanidá pública y en sofitu a los compañeros zarraos nel edificiu. De manera espontánea, los concentraos dirixéronse a la sede de Presidencia y, al nun ser recibíos, fixeron una sentada nes escaleres de la entrada pa depués continuar cola protesta na plaza del Carbayón.

Na semeya, Francisco Menéndez, responsable del sindicatu Sicepa/Usipa.