Iniciativa pol Asturianu y l'Asociación de Trabayadores de la Normalización Llingüística aconceyaron en Xixón

L’Antiguu Institutu acoyó esti xueves un alcuentru ente representantes d’Iniciativa pol Asturianu y de l’Asociación de Trabayadores de la Normalización Llingüística (ATNL). Dambos coleutivos van entamar “una collaboración estrecha”.

Según anuncia l’organización que trabaya pola normalización del idioma, l’alcuentru sirvió de toma de contautu pa conocer les demandes de los trabayadores de los 14 servicios de normalización llingüística activos anguaño nel país. Los dos coleutivos dieron asina los primeros pasos pa entamar “una collaboración estrecha” y preparar aiciones conxuntes nun futuru.

“Dende Iniciativa pol Asturianu valoramos perpositivamente esti alcuentru, granible ensin dulda, y vamos afitar un calendariu pa futuros aconceyamientos periódicos cola ATNL”, señalen dende la estaya de Comunicación y Prensa de la organización. Otra manera, yá se pue sentir na rede’l tercer programa de ‘Iniciativa pol Asturianu nes Ondes’, grabáu mientres la Universidá Asturiana de Branu (UABRA). Nél participaron Ana María Cano, presidenta l’Academia de la Llingua Asturiana (ALLA), y Xosé Antón González Riaño, direutor de la UABRA. Emiten esti programa Radio Sele, Radio Ujo, AllerFM, Radio Ḷḷena, Radio Kras, Radio Noreña, Radio Nava y la belga Radio Alma.