Izquierda Xunida de Xixón esixe la continuidá como serviciu públicu del centru ‘Calor y café’

Foro Asturias Ciudadano va pesllar el vienres el Centru d’Alcuentru y Acoyida ‘Calor y café’ alegando falta d’un espaciu pal mesmu tres finar el contratu d’arrendamientu del so llocal. IX esixe la so continuidá nel equipamientu social d’El Natahoyo.
 
Tres caltener una xunta col comité d'empresa de Fundaciones y Patronatu del Conceyu de Xixón, que vien entamando les movilizaciones sindicales de refuga al zarru de ‘Calor y Café’, Jorge Espina, voceru del grupu municipal IX-LV, señaló que "el 31 d'agostu va facese efeutivu tanto'l zarru del llocal como los despidos, pero vamos facer tolo posible pa que'l Conceyu recupere la titularidá d'esti serviciu", dixo Espina. La decisión de Foro Asturias Ciudadano (FAC) foi que l’Albergue Covadonga y la Fundación Silóe atendiera a les persones ensin hogar qu’acuden a ‘Calor y Café’, lo que pa IX supón una privatización del serviciu que daba’l centru d’alcuentru y acoyida. En concreto, ésti ufre duches, llavadores, biblioteca, bébora y café caliente a una media de 134 persones diaries de dellos pefiles, amás d’emplegu a trés trabayadores.
 
La razón del zarru ye la fin del contratu d’arrendamientu del edificiu qu’ocupa ‘Calor y Café’ na cai Diariu El Comercio y la negativa de FAC de treslladalu “al centru nuevu d’El Natahoyo”, como esplica Espina. Amás, el voceru d’IX interpreta como "escusa" la falta de fondos municipales alegada pol equipu de gobiernu municipal. "Si ye verdá que nun hai perres na Fundación de Servicios Sociales, ¿cómo s'esplica la contratación d'un cargu de confianza d'alta direición nuevu que nun introduz funciones distintes a les yá realizaes pol personal municipal?", entrúgase.
 
El grupo municipal socialista tamién aconceyó güei col comité d’empresa y treslladó-y el so esmolecimientu pola desapaición del serviciu municipal 'Calor y Café' y la perda de los trés puestos de trabayu. Según el PSOE xixonés, la eliminación del centru vien a confirmar la política del gobierno municipal actual "de non cumplir con compromisos y devaluar los servicios que debería dar” la instalación nueva d’El Natahoyo, onde nun primer momentu taba previstu un espaciu pa ‘Calor y Café’.