Sánchez Gordillo acusa a Interior d’ordenar detenciones de participantes na marcha del SAT

Once participantes na marcha ‘Andalucía en pie’ entamada pol SAT resultaron deteníos tres ocupar un bancu de manera pacífica. L’alcalde de Marinaleda, Juan Manuel Sánchez Gordillo, acusa a Interior de les detenciones.
 
El tamién diputáu andaluz por Izquierda Unida Los Verdes-Convocatoria por Andalucía calificó de “kafkiano” la detención d’once persones participantes na marcha obrera del Sindicato Andaluz de Trabajadores (SAT) con destín a Cádiz qu’ocuparon de manera pacífica una sucursal de La Caixa na barriada d’El Tejar del Puerto de Santa María. Esti actu simbólicu fixóse tres negociar los responsables sindicales col axente responsable y ensin la oposición del personal del bancu, anque al final la Policía realizó once detenciones.
 
Sánchez Gordillo esplicó que la Policía tomó-yos declaración na Comisaría portuense y "ta poniéndolos en llibertá porque nun hai denuncia nin siquier de la propiedá". Según detalló, la oficina bancaria taba "funcionando de normal" y "atendiendo a los sos veceros" mentes esti pequeñu grupu taba protestando ellí "con normalidá". Tres reagrupar a los deteníos, el millar de persones que participen na marcha continuaron col so camín, con parada pa durmir en Puerto Real. Güei ta previsto que los manifestantes lleguen a la capital gaditana.