Mases d’aguamales obliguen a zarrar al bañu sableres del occidente

Playes como les d’Outur o Frexulfe zarráronse al bañu por mor de la presencia d’una masa d’aguamales que tamién afeuta al oriente de Galicia. Éstes, de toxicidá alta, podríen desplazase al centru y l’oriente del país nos díes próximos.
 
La Coordinadora pal Estudiu y Proteición de les Especies Marines d'Asturies (Cepesma) informa que "la masa grande” d’aguamales “alcuéntrase ente los centenares de metros y les tres milles" de la costa. Sicasí, la so presencia na zona de bañu obligó a poner la bandera collorada nes playes d’Outur y Frexulfe, que tovía manteníen al meudía de güei, según los datos de la web del 112 Asturies.
 
El Cepesma valora que mentes los díes próximos les aguamales van espardese en delles zones costeres del centru y oriente asturianu al traviés de les corrientes y los vientos. Amás, tamién llocalizóse una colonia en Cantabria en direición Asturies. La temperatura alta que mantién el Cantábricu esti branu ayuda a una presencia mayor d’estes especies nes nueses costes. En concreto, los exemplares avistaos nel occidente son de la especie 'pelagia nocticula', considerada toxicidá alta y mala visibilidá porque suel tar perbaxo de la superficie de l'agua. Mentes, tamién atopáronse grupos de 'carabela portuguesa' na vertical de Cadavéu, organismu colonial problemática al contautu colos bañistes.