Los profesores salieron a la cai pa defender la escuela pública

Más d’un centenar de profesores salieron a la cai esti llunes n’Uviéu en defensa de la escuela pública y contra’l despidu d’interinos. Los convocantes cifren en 600 los trabayadores que van perder el so emplegu en setiembre.
 
La movilización principió con una concentración na Plaza la Escandalera, a la que siguió una manifestación y una asamblea énte la Conseyería d’Educación, Cultura y Deporte, onde se se procedió a una suelta de globos. Esta aición de protesta convocada pol Sindicatu Unitariu y Autónomu de Trabayadores de la Enseñanza d’Asturies (SUATEA) xunto cola Asamblea de Interin@s por la la Escuela Pública, la Marea Asturverde y el Movimientu Social pola Escuela Pública, enmárcase na denuncia de los recortes n’educación qu’aplica la conseyería y que suponen, ente otres coses, el despidu de más de 600 docentes interinos, l’aumentu de la ratio n’Educación Infantil y el zarru de centros de formación del profesoráu, según señalaron los organizadores.
 
Una de les maestres afectaes, Irene Muñiz, esplicó a los medios de comunicación que tolos recortes tán "repercutiendo na calidá de la educación pública" y pexjudiquen a los alumnos porque "empeoren la educación". Dixo qu’esperen que’l Gobiernu escuche los sos pidimientos porque "pue parar" les intenciones del Executivu estatal. Pela so parte, otra profesora, María Fernández, comento que tres estes midíes escuéndese un intentu de "privatizar y mercantilizar la enseñanza col argumentu falsu de que nun hai perres pa mantener la pública".