Cangas entama la so VIII Selmana Cultural

El conceyu de Cangas entama la so VIII Selmana Cultural ente’l 23 y el 28 de marzu. Esta edición va dedicase al escritor autodidacta de Mieldes, Basilio Garrido, que cunta con obres escrites  n'asturianu occidental y castellán, poles que foi yá homenaxeáu nel II Alcuentru d'escritores n'asturianu occidental nel añu 2006. Recitales, presentaciones de llibros, teatru y conciertos conformen la programación d’esti eventu.

Col títulu “Basilio Garrido. Del l.labiegu a la pluma” emprincipia esta VIII Selmana Cultural entamada pol Conceyu de Cangas del Narcea. El llunes a les 19.30 va presentase na Llibrería Treito’l poemariu d’Ignaciu Llope “El combate melancólicu” y a les 20:30 va proyectase nel teatru Toreno “Filandón en Xedré” de Naciu i Riguilón. El martes tamién nel Toreno a les 20:30 va representase “La trastienda de los enredos”. El miércoles nel mesmu escenariu y a la mesma hora va haber un recital con llectura de testos de Basilio Garrido a cargu de Xuan Bello, Antón García, Ignaciu Llope, Chema Rodríguez, Esther García, Roberto González-Quevedo y Ernesto G. del Castillo “Neto”. Darréu va haber un conciertu de los cantautores Rafa Lorenzo y Pedro Pereira y van entregase los premios del VI Concursu de Cuentos n’asturianu occidental.

Yá’l xueves nel teatru Toreno a les 20:30 va celebráse un conciertu del grupu Tuenda. El vienres nel mesmo llugar y a la mesma hora va falase sobre “Vida ya obra de Basilio Garrido”. Finalmente’l sábadu va inauguráse en Mieldes a les 13:30 una placa-homenaxe a Basilio Garrido y va proyectase la película “Carne de gallina” nel Toreno a les 20:30 hores.