Los deportistes asturianos algamaron dos medayes nos xuegos de Londres

Un oru y un bronce. Ésti foi’l resultáu algamáu polos ocho deportistes asturianos que participaron nos Xuegos Olímpicos de Londres, que finaron el domingu con un gala de clausura espectacular protagonizada pola música británica.
 
L’ésitu asturianu mayor nos trixésimos Xuegos Olímpicos de la era moderna tuvo llugar a 136 millas de la capital inglesa, na población costera de Weymouth, y contó col protagonismu de la xixonesa Ángela Pumariega. La regatista perteneciente al Club Astur de Regatas algamó l’oru en clase Elliot 6m xunto coles gallegues Tamara Echegoyen y Sofía Toro tres derrotar na final al barcu australianu. D’esta forma, Pumariaega consigue’l sestu oru p’Asturies na so historia tres los ganaos por Pedro Pidal, Marqués de Villaviciosa (Paris 1900, tiru al pichón); Alfonso Menéndez y Antonio Vázquez Mejido (Barcelona 1992, tiru con arcu); María Ángeles Rodríguez (Barcelona 1992, ḥoquei); Luis Enrique, Manjarín y Abelardo (Barcelona 1992, fútbol); y Samuel Sánchez (Beijing 2008, ciclismu en ruta).
 
Otra xixonesa, Jessica Alonso, foi l’autora del gol que sentenciaba’l partíu pol bronce ente la seleición española de balonmanu y Corea del Sur (31-29) cuando se disputaba la segunda prórroga. La xugadora del Zaječar serbiu consigue asina otru gran ésitu tres el tercer puestu del Mundial de Brasil celebráu nel 2011.
 
Diploma pa Raúl Entrerríos y Juan Fernández
 
Nel balonmanu masculín, Raúl Entrerríos nun pudo repetir el bronce de Beixín y tuvo que conformase con un diploma tres cayer contra Francia (22-23) en cuartos de final. Nun sestu puestu terminó la de ḥoquei na que participó Juan Fernández, puestu que tamién da derechu al diploma olímpicu.
 
Una bona actuación tamién foi la del tirador Jorge Llames, que terminó undécimu na modalidá de pistola de velocidá de 25 metros. Nun tuvo suerte’l boxeador d’orixe dominicanu Jonathan Alonso, que cayó en primer ronda col iraní Medhi Toloutibandpi por 12-16, y Adrián y Mata, que formaron parte del mayor fracasu de la delegación olímpica d’España en London 2012. La seleición de fútbol tornó pa casa ensin marcar nin un gol nun grupu, a priori, cenciellu. Perdió con Xapón (1-0) y con Hondures (1-0) y nun pasó del empate con Marruecos (0-0).