Convócase'l XIV Certame de Poesía y Dibuxu de la Selmana de les Lletres

Con motivu de la celebración de la XXX Selmana de les Lletres Asturianes, qu'esti añu tará dedicada a la escritora ribaseyana Enriqueta González Rubín, la Conseyería d'Educación tien convocáu'l XIV Certame de Poesía y Dibuxu empobináu a los neños y neñes que cursen estudios de Llingua Asturiana nes sos diferentes estayes: Educación Infantil, Primaria, Secundaria y Bachilleratu.
Les bases son les que siguen darréu:
 
PRIMERA.- Pue participar tol alumnáu d’asturianu y de gallego-asturianu dende 4 y 5 años d’Educación Infantil a 2u Cursu de Bachilleratu.
SEGUNDA.- Los escolinos y escolines d’Educación Infantil de 4 y 5 años y 1er Ciclu de Primaria, han participar con un dibuxu inspiráu na vida y obra de Enriqueta González Rubín. Los otros ciclos han participar con poesíes escrites n’asturianu o en gallego-asturianu y ser inédites.
TERCERA.- La temática de los poemes ha tar averada a la vida y obra de Enriqueta González Rubín. El llargor ye llibre. Los rapacinos y les rapacines que participen nel 2u y 3er Ciclu d’Educación Primaria podrán dibuxar el testu presentáu y sedrá valoráu por parte del Xuráu.
CUARTA.- Daránse tres premios por caún d’estos siete ciclos establecíos: 4 y 5 años, 1u, 2u y 3u de Primaria, 1u y 2u d’ESO y Bachilleratu. Estos consistirán en llotes de llibros y trofeos. Fadráse mención especial a los centros de los alumnos y alumnes ganadores del CERTAME con un diploma acreitativu.
QUINTA.- El Xuráu tará formáu por persones averaes al mundu de la narrativa y de la educación.
SESTA.- Los trabayos podrán presentase, pol autor o autora o pol centru educativu, al Coordinador d’Enseñanza de la Llingua Asturiana, Plaza d’España, nu 5, pisu 2u, 33007 - Uviéu, hasta’l día 3 d’abril 2009, nun sobre zarráu nel que s’escribirá: XIV CERTAME DE POESÍA Y DIBUXU “ENRIQUETA GONZÁLEZ RUBÍN”. Nel sobre meteránse: los dibuxos o les poesíes que llevarán TÍTULU, NOMATU, CICLU y CENTRU del autor o autora, y la PLICA na que s’escribirá la rellación de los y les autores cola so verdadera identidá.
SÉTIMA.- El fallu del Xuráu fadráse públicu na “XXX Selmana de les Lletres Asturianes”. Los premios del CERTAME daránse’l día 7 de mayu de 2009, na Casa la Cutrua de Ribeseya, nel actu organizáu pola Conseyería d’Educación y Ciencia y l’IES Avelina Cerra de Ribeseya, nel que se celebrará l’homenax escolar a ENRIQUETA GONZÁLEZ RUBÍN
OCTAVA.- La participación nel CERTAME supón tar d’alcuerdu coles bases establecíes. Al fallu del Xuráu nun se podrá retrucar.
 
Fonte: Páxina web de la Conseyería d'Educación y Ciencia.