Paz Fernández Felgueroso, presidenta del Conseyu de Comunidaes Asturianes

La ex alcaldesa de Xixón, Paz Fernández Felgueroso, ye la presidenta nueva del Conseyu de Comunidaes Asturianes. Nieta d’un avilesín que coló a Cuba nel sieglu XIX, la so misión va ser la d’ameyorar la situación de la emigración.
 
Según recordó l’Executivu asturianu, el Conseyu de Comunidaes Asturianes ye l’organismu asesor del Gobiernu en materia d’emigración y, al mesmu tiempu, tien una collaboración permanente colos centros asturianos de fuera del país para que participen na vida social y cultural d’Asturies. Ente les actividades más destacadas del Conseyu ta la Escuela de Asturianía, que permite a mozos y moces de los centros asturianos de tol mundu recibir enseñances acerca de les tradiciones culturales y la realidá actual del país.
 
La primer edil de Xixón ente 1999 y 2011 ye nieta d’un emigrante avilesín en La Habana, polo que nun oculta la so satisfaición por esti cargu non retribuíu dende’l que desendolcará nos cuatro años próximos un llabor d’apoyu a los miles d’asturianos y descendientes que viven fuera d’Asturies.